特區政府做嘢永遠過火，早前唔知邊個咁好計仔，喺電視台晚間黃金時間新聞報道前加插一輯「心繫家國」嘅片段，大播中國國歌同威水片段嚟增加港人對祖國嘅認識以及認同，實行搞愛國洗腦，比中央台重緊要。
八方聽聞，有關當局覺得「心繫家國」十分成功，所以有人建議加料，喺片段前後各加一節自問自答式嘅宣傳。名為加強對國歌嘅認識，嗰四條問題都好鬼嚴肅啫，包括：1.國歌嘅歷史背景；2.國歌嘅法律地位；3.國歌歌詞精神所在；同埋4.國歌嘅重要性等。嘩！咁硬銷，直情係想迫到港人個腦爆炸啫，對三個電視台嚟講，簡直係靠害，嚇走晒啲觀眾。
香港回歸已七年幾，搞吓愛國教育無可厚非，不過，就唔可以太過份。香港人其實都唔知幾愛國，噚晚支聯會喺維園為前總書記趙紫陽臨急臨忙搞咗個悼念集會，一叫就有萬五人到場，你話係咪心繫祖國啦。
中國共產黨始終都唔明，香港人雖然大部份都受西方教育，但係對於中國大陸仍然係血濃於水，只要見到祖國人民生活有所改善，行動同思想更自由，國家愈嚟愈民主愈富強，大家都會支持，但係你叫香港人盲目跟風、黑白不分，就好難啦，電視台日播夜播國歌都冇用。
公道自在人心，平反六四，還趙紫陽一個公道，向全中國人道歉，咁樣先可以令香港人心服口服，當年胡耀邦有呢種氣魄撥亂反正，今時今日嘅胡溫就真係有啲無能為力。不過，做人就係咁，要有所堅持，最後一定會勝利嘅。
傳真︰2623-9278
電郵︰