現正喺美國留學嘅韓國女星宋慧喬，於今個月十五號慘遭前經理人勒索二億五千萬韓圜（約一百九十萬港元），佢嘅母親同經理人公司報警求助，而韓國警方喺前日已經將涉案嘅前經理人拘捕。
據韓國警方透露，宋慧喬前經理人喺今個月十五號寄恐嚇信到喬妹首爾（前名漢城）嘅屋企，威脅喬媽要喺二十號下午六點前預備二億五千萬韓圜，到時會有速遞員接收，否則就對喬媽和喬妹淋鏹水。由於喬妹𠵱家正身處美國留學，喬媽與喬妹經理人商量後，決定向警方求助。韓國警方大前日喺喬妹屋企附近埋伏，又向送貨嘅速遞員查問。最後警方假扮成速遞員，將涉案嘅前經理人拘捕。
據知被捕疑犯過往有唔少犯事紀錄，佢喺上年六月以拍攝寫真集為理由，以喬妹經理人身份向雜誌社私自收取手續費而被公司解僱。而警方指疑犯嘅供詞表示，由於喬妹係知名演員，認為佢即使受到恐嚇都唔會報警，所以計劃今次恐嚇行動。另外，警方喺恐嚇信上發現疑犯以外，另一人嘅指模，因此懷疑重有其他同謀。而據喬妹身邊嘅工作人員表示，喬媽飽受驚嚇，驚到連嘢都講唔到。