周啟生現正籌備三月份舉行棟篤唱，他揚言現今娛圈搞「大圈子」，正如他早前自薦參演賑災騷，卻因沒有經理人做靠山而未獲安排到場，他又指新晉歌手不懂唱歌，才被唱歌像念經的周杰倫打低，十分丟架。
周啟生計劃於三月舉行棟篤唱演唱會，邀請許冠英和陳松伶擔任嘉賓。日前他在銅鑼灣接受訪問時說：「呢次我想有啲突破，冇人知我可以講笑，搞棟篤唱可以令大家笑吓，互相諷刺，但唔係得罪人。」故他亦會將娛圈的部份題材放進演唱會中。
提起娛圈，周啟生就顯得滿有感觸，他表示早前於香港大球場舉行、為南亞災民籌款的《愛心無國界演藝界大匯演》，他曾聽到電台呼籲歡迎所有演藝界人士參加，於是他致電某人要求參演，但對方卻着他做網上呼籲，毋須到場。
周啟生說：「個南亞賑災騷又話個個可以嚟唱歌，但我睇件事唔係咁，成件事裏面係霸住嚟玩，搞大圈子。我覺得好唔健康，我冇經理人、冇大公司做靠山就係咁，我扭開電視機，只係見到成班唔識唱歌嘅後生仔喺度唱歌，結論係唱片業搞成咁，係咪全部同翻版、上載下載有關？周杰倫點解又賣得？香港人丟架呀，俾個唱歌好似念經嘅台灣仔打低，但人哋係有風格、有心機，成班人真係鞭長莫及。」
早前Beyond曾稱新四大天王是蟹黃，周啟生對此亦有一番見解，他笑說：「我等咗半世人，諗住有得上位，點知俾古巨基得咗，令我覺得幾難堪，長夜難眠。新四大天王我當新聞嚟聽，密切留意事態發展啦。梁漢文嘅歌我好少留意，古巨基靚仔囉，許志安嘅唱歌風格，唔係我所喜歡，李克勤係我朋友，佢唱歌嘅力量同質感兩方面都好，但唔夠柔軟度。」
採訪：朱倬誼 攝影：何國豪
場地：UNION
