港股始終都係弱勢，前日反彈74點，噚日又大跌番135點，臨尾期指重插低，收13455，跌183點，低水擴大到88點，現貨成交略增到196億元。大市短期嘅調整應該未完成，筆者傾向恒指會先跌落13000至13200水平，才會出現一次較像樣嘅反彈。
澳門概念股日日有動作，噚日又見到嘉華系停牌，今次應該有好消息嘞。聽可靠消息講，嘉華系已獲得官方准許注資嘅批文，一直以來，嘉華系都係等呢樣嘢，家吓到手，注資可水到渠成了。
邁特科技（1031）避過濠股風暴後復牌，最高成過0.57元，升3仙，揸家還得神落，收0.485元，跌10%，受大市影響而已。
結好控股（064）前日大升後，噚日變得好波動，中段曾升上3.875元，但午後又大插，低收3.20元，倒跌0.30元。
本月初，結好由2.0元起步，只兩日時間，就飆升到5元，之後出現調整，在2.50元水平獲得支持後，升勢又再現，唔單止重上10日線之上，近兩日更有大成交支持，股價已形成一個小圓底（成交亦然），短期在4元水平會有阻力，整固後再上，可挑戰前高位。
兩日成交大增，有消息指鑽石陣容新股東中嘅大孖沙，繼續大手吸納，佢哋由1.80元「披成」時開始接貨，到現時股價倍升後，重係咁買，後市睇得幾好，都唔使畫出腸。
市場又有消息，話結好未來動向同濠賭有關，而且個「波蓆」好大，所以，唔排除較後時間（4月開始嘅下個年度）會再安排多一次「披成」，由於斟購項目涉及巨資，新股作價料會高出好多。
噚日結好股價先急升後急挫，相信係同震倉有關，而呢個亦係大戶在部署要大做之前慣常所用嘅手法，一來要「嚇」走跟風客，二來要食埋街外嘅「游離貨」，睇多一兩日，若然走勢維持一浪高過一浪，則不妨小注追入，博大堆。
銀建國際（171）調整完成，基金買盤又將佢掃高，收4.075元，逆市而升0.1元，成交3500多萬股，有消息話銀建現時在歐洲「路演」，反應遠比預期為佳，睇勢升破4.125元高位阻力後，可向5元推進。
郭兆誠