迪比亞路喺祖記嘅地位認真危危乎，教練卡比路已經講到明：「唔會刻意遷就佢，用邊個打正選，首先考慮嘅係贏波。」人生梗係有起有跌嘅，作為過來人嘅蘇拿，就喺上場對祖記嘅賽後鼓勵咗迪比亞路一番。當日，蘇拿拉佢埋一邊同佢講：「睇開啲啦！你要忘記自己係迪比亞路，因為你𠵱家要從頭嚟過……明天會更好啊！」
聽完之後，迪比亞路當堂唔再頭耷耷，眼濕濕，成個醒晒。重喺自己個人網站寫咗啲勵志嘅說話，話自己同祖記唔會受目前嘅不如意影響咁話。
查實同三十八歲嘅蘇拿相比，迪比亞路嘅不如意算得係咩！佢至少都叫做曾經少年得志，重踢走埋球王巴治奧㖭，都可謂不枉此生啦！
九○世盃十六強巴西對阿根廷，馬勒當拿同肯尼基亞嘅合作搞掂巴西佬。十五年後，阿根廷教練比拿度，自爆當年軍醫畀咗支落咗迷藥嘅水畀巴西球員飲，搞到班友手軟腳軟。後來比拿度反口話記者老作，但隨即俾當時有份飲嘅白蘭高踢爆，話個隊醫同隊長勒基利親口承認嘅。
列斯門將卡臣突然有好多大球會爭相羅致，利物浦領隊賓尼迪斯決定加入戰團，希望爭贏呢位本土最有前途新秀門將。車路士早前就開出一百萬鎊轉會費，而「紅軍」亦志在必得，賓尼迪斯話最有利係畀卡臣嘅上陣時間，一定多過有全英超穩健門將施亞在陣嘅車路士。
勒邦占士終於恨到喇！啱啱過咗二十歲生日冇耐嘅「占士大帝」，喺噚日作客拓荒者時大發神威，個人攻入咗二十七分、十一個籃板同埋十次助攻，攞到NBA生涯上第一個「大三元」，而且重成為NBA史上攞「大三元」最後生嘅球員㖭，唔怪得咁多人大讚佢技術夠全面喇！
最近球王比利以近乎代言人嘅身份，為皇家馬德里宣傳，今季沉淪到降落意大利丙組嘅拿波里有樣學樣，希望搵當年球會象徵人物馬勒當拿幫手做宣傳，有可能畀個榮譽會長佢做吓。那不勒斯人不嬲當馬勒當拿係神咁拜，如果成事的確可增加球會凝聚力，有百利而無一害。