昨日最熱門的話題係嘉華國際（173）同埋嘉華建材（027）停牌搞乜嘢？反而網通（906）阿媽入股電訊盈科（008）就唔係咁多人談論，皆因單料一早通天，要買嘅一早買咗，要沽嘅亦一早沽咗，無甚驚喜可言。
嘉華兩母子今次能否注入賭業資產影響深遠，皆因澳門賭業呢個概念玩咗咁耐，大上完又大落，但嘉華母子注入大股東賭業一事，仍然只見身郁唔見米白，噚日急升後停牌，市場傳言多多，但究竟係龍係鳳，始終冇人講得出（聽講即將有公布）。家陣濠賭股氣勢已大為轉弱，如果佢哋搞唔掂，會好影響市場氣氛。
至於停牌兩周，避過早前濠賭股股災一劫的邁特科技（1031），昨日高開低收，最高見0.57元，最低見0.47元，收市抽回0.485元，仍跌10.19％，成交股數高達8.06億股，金額4.15億元。
經紀陳話，噚日幕後有唔少炒家出嚟力頂，雖然今次邁特收購澳門皇家金堡酒店連賭場呢個消息，冇以前咁有爆炸力，但江湖傳聞陸續有殺着使出，包括向主要股東收購最好搵嘅黃金廳等。
慕容小初