鄭中基早前到印度拍攝賀歲片《喜馬拉亞星》，他在該片中要應付一些高難度動作，但由於不懂瑜伽，拍攝前要預先鬆筋同拉筋，又要吊威吔配合，而他在印度的兩個多月期間，竟被當地人誤當是成龍，更爭着和他合照。
鄭中基去年主演的兩套喜劇電影《龍咁威》及《我要做Model》均有不俗票房，令他在電影淡市中成功跑出，成為新一代笑匠。而早前他聯同劉青雲、吳鎮宇及張栢芝到印度拍攝的電影《喜馬拉亞星》將會在農曆年檔期上映。
日前鄭中基在尖沙嘴接受訪問時表示今次飾演一名隨父母在山上修煉的瑜伽大師，更一人分飾爸爸、媽媽及從未下過山的兒子三個角色，後來兒子落山尋找其指腹為婚的印度西施女友，因而發生連串趣事，他說：「三個角色都係收一份片酬，我完全唔識玩瑜伽，拍之前要鬆筋同拉筋，又要吊威吔配合，有時又要用人哋對腳幫手拍高難度動作，有個動作好似喺人哋個屎忽度捐個頭出嚟，當地嘅印度人都睇到嘩嘩聲。」
在印度停留拍攝超過兩個多月的鄭中基表示對當地人印象難忘，更多次被當地人認錯是成龍，他說：「我已經話我唔係成龍，不過佢哋堅持話我係，成日攬住我影相，我驚下次成龍去到印度，人哋唔信佢係成龍。」
而鄭中基此行更買了當地的披肩回來送給母親，他更大讚吳鎮宇講價厲害，令大家省回不少錢，他說：「人哋開價三千，佢都可以還價到五十蚊就有交易，成個婆仔咁，有時重唔理人哋肯唔肯賣，擺低錢就走人。」
面對農曆年檔期由梁朝偉主演的《韓城攻略》，鄭中基對票房依然有信心，他說：「得兩套港產片，大家可以兩套都睇晒，佢係動作片，我哋係動作笑片，況且有青雲喺度，票房一定會好穩陣。」
採訪、攝影：卓美娟
