日韓興啲乜：<br>漢城街頭搞鬼騎呢Snapshot

日韓興啲乜：
漢城街頭搞鬼騎呢Snapshot

跟團遊韓國，每日跟大隊坐旅遊車去指定地點、做大會指定動作、食完買完之後又排隊上車返酒店大覺瞓，悶！何不來個自由行，擺脫鴨仔式行程，迫吓公共交通工具，喺街邊拮吓小食，咁先至能夠睇到當地人真正一面。所謂韓國興啲乜，其實除咗食買玩之外，應該行吓街四圍昅吓影吓Snapshot，咁先會有更深體會。
記者：張銘恩
攝影：陳陶鈞
鳴謝：韓國觀光公社（www.tour2korea.com）

宣傳招數一味夠誇

韓國人宣傳手法一味夠誇，誇張得有啲過份，過份得甚至有啲擾人，或者佢哋認為畀錢喺電視同雜誌賣廣告，論成效還不如走到街頭直接同路人Hardsell。在漢城街頭行番轉，行唔夠十步就會見到各種嚇你一跳的宣傳手法，商舖為求博路人望兩眼，扭盡六壬，派傳單、貼街招、整大型Display，要幾誇有幾誇，除非發雞盲，否則一定吸引到路人的注意力。

■派傳單方法有好多，其中一種就係唔派畀你，貼晒喺地，自己睇啦！

■街邊泊過夜車要小心，第二朝架車分分鐘會貼滿宣傳單張，搞到都唔知邊架係自己嘅。

■搵個古代人攞住招牌企喺路中心大嗌，慌死人唔知間食店Sell原始原創食物。

■呢度係韓國，大猩猩同ABathingApe無關，以高難度動作示範爬牆，其實係宣傳運動背囊。

韓國地鐵眾生相

所謂的香港地鐵站眾生相，不外乎係企喺度瞓、無位坐坐地下、情侶依泣又或者用電梯扶手做引體上升咁，比起管制寬鬆的漢城地鐵，認真小巫見大巫，循規蹈矩的香港乘客搭漢城地鐵肯定大開眼界、嘖嘖稱奇，腦海不禁浮現以下問號：「咁都得？唔係嘛？」

■地鐵站居然變街市，賣橙檔主久唔久重會大嗌：「埋嚟睇，埋嚟揀，十蚊兜好抵食！」服未？

■香港地鐵站頂多有學生賣旗，韓國地鐵站卻有十數人的慈善大樂隊演奏，為窮人籌款，善心人可將心意放入鐵鑵內。

■香港興遊街示威，韓國青年卻選擇掛牌企喺地鐵站，向政府表示不滿。

傳教毋懼寒風冷眼

星期日的明洞街頭尤其熱鬧，除咗有旺角咁密集的Shopping友外，重會有好熱心的教友在傳福音，教友唔會捉住路人講耶穌，只會在街頭以唱聖詩祈禱的方式傳福音，一首又一首的聖詩，全日不停播放，雖然聽唔明佢哋唱乜，但講真唱得認真唔錯，可惜大部份路人都當佢哋透明，在冷眼與寒風中仍如此堅守信仰，問你服未？

■大班教友立於路中心，以優美歌聲傳福音。

■單人匹馬一樣帶齊架生孤身上路，背誦聖經同祈禱，一企就幾粒鐘。

街邊檔有得玩有得食

好多人會覺得街頭小食重好味過大酒店同餐廳，因為入口多一啖風土人情，味道零舍唔同。漢城的流動街邊檔非常蓬勃，幾乎喺每一個區都有，小食好味唔在講，食法重與眾不同，街邊檔造型重極搞鬼，與香港的辣魚蛋手推木頭車好唔同。

■打橫油桶用嚟煨番薯，內分為一格格櫃桶仔，好過癮。

■漢城入冬氣溫閒閒哋低過零度，好多貨車熟食檔會架起帳篷擋風，呢架車變身後外形好似龍貓巴士。

■街邊檔賣黃糖餅，若可完整取出餅上圖案，檔主會送多塊，約$4。

編按：「日韓興啲乜」至今日完結，下周一將有新版面推出，敬請留意。

■餅上的圖案印其實好淺，餅又脆，要好有技巧才能成功。