以前睇田亮跳水，原本對佢幾有好感，但最近見佢講嘢大話連篇，馮仁昭對佢都幾反感，佢話從來冇接受過香港記者訪問，但事實上佢之前嚟香港出席過咁多公開活動，就俾記者訪問過無數次，就連本報都有記者打電話訪問過佢，證明佢份人講大話咁叻，唔入娛圈就嘥料啦。
馮仁昭又聽到田亮話自己唔想入娛樂圈，更唔想喺娛樂版見報，淨係想喺體育版出現，但佢唔想入娛樂圈，咁點解又會同英皇簽約，乜英皇有搞體育生意咩？佢話唔想喺娛樂版出現，但又走去港台十大中文金曲頒獎禮，然後又同謝霆鋒、容祖兒唱K，猜「十五二十」，唔通田亮嘅行為係體育新聞咩？田亮話自己依然係運動員，但國家跳水隊年底已開始冬訓，佢就遲遲未去報到，連郭晶晶都承認錯誤，而佢俾領隊周繼紅公開批評並拒於門外，唔通呢啲係運動員嘅作風？唉！馮仁昭都係鍾意睇田亮跳水多啲喇！
林尚義（阿叔）之妻劉慧芳噚日九時半喺香港殯儀館出殯，之後就送咗去柴灣歌連臣角華人永遠墳場安葬。殯儀館嘅禮堂雖然用西式布置，但就行中式嘅儀式，林太終年四十幾歲，喺今個月初因為肝硬化而引致內出血病逝，阿叔噚日喺靈堂裏面滿面愁容，十分之傷心。
江芷妮前晚去咗新城接受訪問，佢話自己主持《都市閑情》後多咗好多公司搞活動搵佢做主持，無形中多咗好多收入，江芷妮話：「我重拍咗好多廣告，有瘦身纖體嗰啲客戶搵我。」不過江芷妮就歎入行後冇乜男士追求，佢話：「我未入行前都多人追，入咗行後就冇乜，我要求唔高，真心就得。」
薛家燕同一班無綫藝員噚日喺尖沙嘴為下星期一無綫電視播映嘅韓劇《大長今》做宣傳，佢哋重着起成套韓國民族服裝出現，不過就為咗着呢套衫而搞到遲咗出場，家燕姐話：「着呢套要紮胸，所以搞咁耐至出到嚟。」家燕姐話為咗紮胸重要真空上陣，情形好似年輕時反串做男仔咁，不過好彩冇影響到發育喎。
梁詠琪（GiGi）噚日同詹瑞文、藍奕邦喺尖沙嘴文化中心綵排舞台劇《娛樂大家》，GiGi清唱水準唔錯，佢話近排都聽到有人讚佢唱現場唱得好，佢話可能係做舞台劇有機會訓練自己，連聲都開埋，屋企有幾層樓，佢由一樓叫上去四樓同媽咪講嘢，媽咪都聽到，𠵱家連對講機都唔使用，中氣十足。
