「佢冇乜特別位置」
官恩娜徹底排斥房祖名

官恩娜早前與房祖名傳出緋聞，因祖名多次拒絕合照，所以官恩娜亦徹底與祖名劃清界線，她表示不想與祖名傾偈和合照，更不想與他拉上關係，她說：「喺我認識嘅人入面，佢冇乜特別位置。」

官恩娜早前與成龍愛子房祖名一起往紅館看騷，繼而傳出緋聞，其後男方在公眾場合中多次拒絕與她合照，故官恩娜堅稱日後若對方肯與她合照也要考慮。官恩娜說：「我同佢唔熟，點頭之交，大家都係舊年新人，對佢冇乜特別感覺，有呢啲新聞真係好無奈，件事（緋聞）又唔係真。」

「以為我黐佢啲乜」
官恩娜更徹底與祖名劃清界線，她說：「我唔知佢點啦，但我唔想同佢影相，唔想同佢拉上關係，亦都唔想同佢傾偈，我好驚人哋以為我黐佢啲乜。○四年有咁多新人，大家都相處好好，我本身都鍾意和平，但世界有唔同嘅人，我唔可以干涉人哋做任何嘢。」
問官恩娜是否很嬲祖名拒絕與她合照？她說：「喺我認識嘅人入面，佢冇乜特別位置，感覺唔係十分大。」問官恩娜會否擔心因而得罪成龍？她說：「冇諗過呢啲！」

拍MV不慎跌倒
此外，早前穿上吊帶薄紗裙的官恩娜在街頭拍攝新歌《捉迷藏》MV，冷得她騰騰震，鼻水直流，故不用拍攝時，她即披上大褸瑟縮一角，官恩娜笑言已冷得口震震，咪嘴也咪了八次才完成。官恩娜在MV內做回自己，內容指她不時被狗仔隊追蹤，當她在一商場內拍攝奔跑避開記者鏡頭時，卻不慎跌倒，幸沒大礙。
採訪：朱倬誼
攝影：陳志嵐
服裝：FrenchCollection&izzue
場地：sodacafe&bar