日進測量師行日前拍賣九龍塘喇沙利道十一號四樓C單位連車位，落成超過四十年，表面上平平無奇，但幾富傳奇色彩，據聞已故著名填詞人黃霑同家人曾經住過。
原業主因觸犯防止賄賂條例，畀廉署控告，單位被凍結咗二十幾年，最後法庭判決，將物業充公，由產業署委託日進拍賣，開價三百三十萬，有五個買家爭奪，終以四百三十五萬成交，單位實用面積約九百呎，呎價四千八百，屬市價水平。
日進董事李永成表示，買家係該廈業主，連埋呢個單位，總共持有三四個單位。大廈高五層，每層三伙，總共得十五伙。
李永成話，對上一宗成交喺舊年十二月，但再之前就已經係十幾年前嘅事。都目前為止，大廈暫未有放盤個案。
聽街坊講，黃霑七十年代曾租住呢度，個女黃宇詩都係喺呢度出世。
蘭西噚日收到民建聯一份會訊，發現佢哋原來好猛料，皆因可以搵到恒基地產發展部總經理黃浩明講「住宅樓市的未來」，梗係要細心睇吓啲內容啦！
黃浩明話，𠵱家市區豪宅呎價過萬，甚至兩萬蚊呎都有，但中小型住宅依然得五六千蚊一呎，原因係香港結構改變，打工一族嘅工作安全感雖然有回升，但工資就未有得加或加得好少。
不過，老闆級就受惠工業北移同美國市場蓬勃，身家不斷上漲。佢指出，除非打工仔人工未來有可觀增長，唔係樓市都會繼續維持豪宅表現優於中小型住宅嘅局面。
過去一年豪宅樓價狂升，呎價動輒過萬，唔少業主見價錢理想，都趁勢放盤。
美聯楊永健透露，壽臣山樓齡超過二十年嘅低密度豪宅松柏花園，最新呎價已突破一萬蚊，比九七年更高。
所以，自住超過二十年嘅外籍業主都受唔住誘惑，割愛出售一手買入嘅複式單位，面積三二五七呎，連約一千呎平台同雙車位，成交價三千九百萬，呎價近一萬二千蚊，正好係佢八三年購入價三百八十八萬嘅十倍，賺三千五百幾萬，機會難逢，難怪業主理智戰勝感情。
中意控股副主席林岱，私人持有嘅一層金鐘遠東金融中心，未截標就以九千五百萬賣咗，呎價九千蚊左右，兩個幾月賺成千萬。
呢層三十三樓約一萬呎，舊年十一月買入價大約八千蚊呎，美記招標，原定月底截標，美記話業主見個價好，趁成交前摸出利潤唔錯，所以唔等截標。
市傳買家係李四叔有關人士，不過恒基噚日並冇回應。
講開「摸貨」，屋之島商業部董事李思博表示，今個月截至二十號，尖沙嘴一共錄得七宗甲級商廈成交，其中三宗係「摸貨」，全部都喺尖東區。
李思博話，呢三宗「摸貨」都係舊年第四季買入，今年第一季到成交期，其中新東海商業中心佔兩宗，十三樓零九至一零室，舊年十一月以呎價五千買入，下個月底成交，𠵱家以呎價五千三百五十「摸出」，獲利八十二萬。而同廈三樓零五至零六室，舊年十二月買入，原本三月底成交，最近「摸出」，賺七十二萬。
另一宗係康宏廣場一一零九室，舊年十月買入，本月底要成交，但買家今個月初匆匆「摸出」，執二十四萬。
早前蘭西提到中原、美聯同利嘉閣三大代理行，舉辦嘅周年晚宴，不約而同齊齊搵明星或歌星壓陣，繼利嘉閣周二晚搵關心妍表演大收旺場之後，周三晚美聯請2R當嘉賓，反應都相當熱烈，證明明星效應果然不同凡響。
美聯以地產代理選舉頒獎禮做主題嘅晚宴，大賣奧斯卡概念，梗唔少得明星壓陣。
當晚2R出場，一大班美記前線湧到台前，雖然初段曾出現有一個咪冇聲嘅意外，但一眾代理冇柴台，重落力鼓勵。連2R話邀請台下員工上場，佢哋都乖乖地唔敢搞亂檔。有啲重不斷咁影2R，啲相留為紀念。
新地代理總經理周國賢為咗上水皇府山馬不停蹄，不過售樓紙始終未到手，個盤未賣得，又要頻頻見記者，佢噚日喺售樓處出現，第一句就話「冇新進展，今日冇嘢公布。」
示範單位設於上水廣場寫字樓，三個單位全部都過千呎，包括兩個特色單位，分別係五座十九樓A室，一千八百幾呎嘅空中花園單位，同埋七座一樓D室一千六百呎嘅連平台單位。標準單位就淨係得五、六座嘅B室，一千一百幾呎。
幾款單位嘅間隔都改動過，好似B室變咗個開放式廚房，A室就將原本嘅睡房變咗做飯廳，而D室就將士多房同睡房打通，其他好似浴室、廚房都整得特別靚，配合單位嘅風格。
電郵地址：
