日本新一代性感女星岩佐真悠子，自去年喺日劇《DeepLove》入面扮演援交少女之後人氣急升，啱啱重獲日本青年漫畫雜誌《YoungMagazine》邀請做封面人物同寫真特輯女郎，岩佐亦非常識做，喺咁凍嘅天仍然着得好sexy影性感相。
岩佐真悠子最近為日本雜誌《YoungMagazine》影咗輯性感相，着咗好多款比堅尼上陣，令人懷疑岩佐會唔會係將夏天拍落嘅倉底貨攞畀雜誌刊登。不過，雜誌畀得佢做封面女郎，岩佐點會咁冇誠意馬虎了事呢。雖然佢影相時着得好少布，但全部都係喺室內拍攝，睇嚟佢影相嗰陣都係開晒暖氣，所以冇影到佢凍到起雞皮嘅相。
岩佐除咗着上深藍色同粉紅色比堅尼之外，其中一套重係用毛冷織成，再配埋條頸巾，化身另一個充滿冬日氣息嘅造型，加埋佢個對會發電嘅明眸同水漾雙唇，真係令啲fans心如鹿撞。不過，岩佐身穿嘅毛冷比堅尼真係令人覺得有啲拮肉，唔多舒服，但佢都一樣可以扮得咁自然，果然夠晒專業！