立法會親中保皇黨前日發民主派爛渣，搞出一鑊「流會」鬧劇，執掌香港教育嘅教統局局長亞瑟王李國章睇唔過眼，大罵親中派，喺立法會上狂數保皇老左議員嘅不是。
亞瑟王語氣好重，面紅耳赤、七情上面鬧班議員，「噚日你哋有冇諮詢市民呀？雙方面，唔好講邊黨邊派，你哋有冇諮詢市民呀？你哋浪費公帑、嘥時間，嘥我哋嘅官員（時間），落嚟冚扮爛唔開會。有冇諮詢呀？你哋都冇諮詢喎。」
激到佢咁嬲，係因為工聯會議員陳婉嫻攻擊教統局推行政策時冇諮詢啲老師。亞瑟王反駁話：「憑乜證據？你講就好容易，跟住記者就會寫話我哋唔諮詢……」佢連保皇黨都敢鬧，認真有吉士。
李國章回應民主黨鄭家富叫佢查找不足時亦好寸，話自己有三個不足，就係睡眠、時間同運動不足；之後佢重一輪嘴咁朗讀出《馬太福音》其中一段寸富仔，話：「為甚麼看見你弟兄眼中有刺，卻不想自己眼中有樑木呢？」富仔話，民主黨向每位局長都咁問，惟獨李國章咁大反應，唔通睡眠不足嘅人都係多疑啲？
（圖）面對議員要求查找不足，李國章（左）好寸咁話自己有三不足，就係睡眠、時間同運動都不足。
傳真︰2623-9278
電郵︰