哀悼趙老問題，北京終於顯示少少寬容，唔搞中央追悼會，不過會有「遺體告別式」，唔知有無中央領導人出席，但已特別恩准，送趙老入「八寶山革命公墓」！重慌死出面亂諗，話儀式簡化，係中央「規定」，級別愈高愈唔搞嘢，咁即是話，至少都唔當趙老係敵人，而係當佢係自己人！
咁樣一來，特區垃圾會一干男女政治小丑，未夠二十四小時，即時醜態現形！奴才即是奴才，可惜今次睇錯面色，以為大陸佬對趙老趕盡殺絕，急急抱住落井下石，點知又一次，佢哋買錯咗！
出咗醜，梗係想遮掩！民建聯及自由黨等親中保皇集團，見自己即時衰咗，一係就賴係詹培忠出晒主意，民建聯嘅劉華，就賴晒立法會主席范徐麗泰，死口咬定泛民主派不顧議事規條，即是違反「法治」，總之就係范徐食晒成隻死貓咁解！
在立法會肅立默哀嘅民主派二十四壯士，對得住趙總在天之英靈，對得住中華民族，對得住良心，反為其餘嘅投機小丑，缺乏人格尊嚴，全港同胞，認住佢哋尷尬萬分、狡辯無從嘅嘴臉，下屆選舉，保持記憶，用選票將呢班男女掃場唾棄！
咁多高官之中，太子章最有原則，佢怒斥投機分子「流會」集團，浪費公帑，浪費官員時間，俾呢班人搞一搞，納稅人唔見咗四十萬！香港市民唔見咗少少錢，但呢班嘢唔見嘅就係良心同人格！
呢個故事教訓港人：一國兩制，高度自治，係由港奸率先破壞嘅！投港奸一票即是做埋幫兇！
中共當然並未轉性！趙總智囊鮑彤嘅夫人，係一個七十幾歲嘅婆婆，佢戴黑紗白花哀悼，慘遭公安推撞落地，胸骨都斷埋，去醫院求診，點知醫生話凡戴黑紗白花嘅就唔收！
呢個係乜嘢國家？趙總早走早着，直頭係解脫。安息吧，趙老！
傳真︰2623-9278
電郵︰