下午三時，睇報紙睇到眼睛疲倦，於是閉目養神，漸入夢鄉，耳邊聽到歌劇音樂，似身在意大利，眼睛望到一群身穿紅色上衣嘅騎師，既似沙田馬場嘅儀仗馬騎師，亦似英國鄉紳出外打獵狐狸部隊之開路先鋒，然後進入龐大官邸，內有綠草如茵大草地，大過政府大球場，又有靚到墨爾本CrownTower賭場酒店嘅羅馬式泳池，加上好多歐洲人穿上禮服在兩千呎大廳跳舞；呢間直情係左丁山夢幻家居，好想買……突然間電話響起，成個人紮醒，聽完電話，望吓寫字枱上張報紙，地產版話豪華貴族生活在上水火車站附近，住屋面積由六百平方呎起喎！
當堂返回現實世界。六百呎都唔夠歐洲古老貴族擺張床，做廁所兼浴室就差唔多。香港貴族住六百呎？喺上水？真係唔識答。一封電郵來自一位西灣河居民CBTai，罵左丁山無稽之談：「先生於元旦日之《戲寶被困西灣河》一文實不敢苟同，查電影資料館距離西灣河地鐵站只五分鐘腳程，西灣河並不是不毛之地，由銅鑼灣經東區走廊往西灣河亦只需五分鐘車程，由此可見左先生及大記者朋友實與時代與平民生活脫節，只知生活在所謂中產階級的象牙塔中。」
中產階級象牙塔應該待在所謂貴族生活廣告之中，左丁山打電話問住響愛秩序灣居屋嘅嘉麗斯：「喂，西灣河電影資料館去過未？」嘉麗斯答：「去過兩次，第一次去就搵錯門口，地鐵站出口指示牌唔清楚，好多人走咗去西灣河文娛中心，大概摸錯門口嘅人太多嘞，文娛中心直情要派發單張，指示市民點樣去電影資料館。」西灣河有大豪宅嘉亨灣在，當然不是不毛之地，可惜太多區外市民根本唔知電影資料館喺邊度呢！