地產市道再起飛，地產經紀呢行，近年就吸引唔少新手加盟，趁樓市升浪搵大銀。美記噚日舉行周年晚宴，筵開一百八十席，慰勞一眾員工過去一年嘅努力，重邀請多間發展商賣樓要員，頒發獎項，畀成績突出嘅代理。
其中，何文田分行Cecila，只係加盟美記十個月，但全年營業額已經高達七百八十萬，奪得新人獎，同時，亦成為美記住宅部營業額最高嘅代理。
聽聞，呢位代理界新女將，以前從未踏足物業代理呢行，之前，只係從事銀行基金工作。
另外，南區紅山分行主管羅文駒，就攞到主管大獎，分行全年營業額，有成三千五百幾萬，係豪宅主導局面下嘅當然大贏家。
前線代理賺到錢，噚晚大事慶祝一番之餘，身為老闆嘅美聯集團主席黃建業，就更加高興，現場表演魔術助興，似模似樣。
經歷改朝換代嘅中銀香港，標售早年起落嘅山頂歌賦山道一號，噚日截標。代理戴德梁行話，有六支標，反應熱烈，業主考慮緊。
呢件外形好似四間洋房合併埋一齊嘅天價項目，可以話係中銀前朝，用嚟款待高層同貴賓嘅豪華酒店，既有泳池又有網球場，每間屋都有幾間套房，而四間屋加埋，淨計睡房，都有三十幾間，如果做番一般豪宅，就要花一筆改裝費，或者索性重建。
個地盤四萬二呎，經已起盡，面積二萬一千幾呎，估值三億幾銀，發展商好似新地、信和咁，就話冇落標。
𠵱家做地產代理，跑數叻原來重未夠，扮鬼扮馬都一樣要咁耍家，目的就係為咗幫啲新盤做宣傳。
噚日中記搞咗個上水皇府山誓師大會，一班主區經理、董事，以歌劇「歌聲魅影」嘅造型亮相。
扮成咁樣，都係想話畀大家聽，皇府山設計有貴族feel，而管理公司，又有提供訂購歌劇門票服務，真係用心良苦。
花咁多心思，賣樓始終最實際，中記話，收咗六百票，新地周國賢就話，星期日開示範單位，畀新地會員。有售樓紙即刻賣。原本保留兩座，其中一座會攞出嚟賣。
中記員工一向積極參與社會公益，除咗捐錢，重有身體力行，上個星期，董事劉瑛琳，出席公司贊助、由兒童刊物舉辦嘅校園小記者活動，同一班小記者，分享吓成功之道，一齊出席嘅嘉賓，重有前名記葉雅媛。
劉瑛琳平時對住記者，多數都係講樓市，分析吓市道，今次對住班小記者，講到成功之道，都難唔到佢。佢話，成功最緊要專心，重要百分百投入。至於佢最崇拜嘅人物，並唔係老闆施永青，而係蕭芳芳，因為覺得佢雖然身患耳疾，都樂觀面對，嗰種積極嘅態度，最值得學習。
電郵地址：
