樂隊Beyond喺下周四會喺紅館開六場演唱會，佢哋重聲稱係Beyond最後一次一齊開騷，fans聽到後，當然即刻撲去買飛，售票情況亦非常理想。
Beyond呢排就密鑼緊鼓為演唱會排練，不過噚日有個fans唔多高興，傳真嚟報館話Beyond冇理佢哋感受，如果今次係Beyond舉行最後一次演唱會，家駒就唔會眼閉，呢位fans又話會喺二月一號，即係佢哋最後一場演出時割脈自殺喎，重話「我希望我嘅死可以令佢哋三思。」
家強噚日喺電話度就回應話：「你幫我問佢幾時割，我搵定人救佢，佢俾人救番之後就知自己有幾蠢，Beyond精神係永遠喺度，分開咗更要樂迷支持，𠵱家係歌迷唔畀機會我哋，叫佢諗吓自己啱唔啱先，叫佢睇晒咁多場先講啦。」
而黃貫中亦好愕然咁話：「唔使咁激動呀？Beyond作嘅歌夠佢聽一世啦，自盡咁蠢，我哋三個都會繼續做音樂，有排佢聽啦。」世榮則謂：「千祈唔好胡思亂想喎，自盡好儍，其實佢應該替我哋高興，人要進步，我哋三個都希望有機會獨當一面。」
女子組合S.H.E噚日喺台灣為一金飾嘅戀愛系列做代言人，佢哋不約而同話喺現實生活入面，佢哋都係戀愛中嘅小女人。Ella曾同舞蹈員小偉、而Hebe就同舞蹈老師大目、Selina則同羅志祥（小豬）分別傳緋聞。Ella早前又俾雜誌拍到佢餵小偉食薯條，佢噚日講笑話：「本來餵完薯條，我還想餵他吃漢堡呢！」
由楊千嬅同方力申做開代言人嘅護膚品牌Biotherm，據知廣告商稍後會加入新成員Twins，廣告商睇中Twins夠人氣，所以邀請佢哋加入。馮仁昭就呢件事求證Twins嘅經理人霍汶希，佢噚日喺電話度話：「係有呢件事，但詳情未能公布。」
麥家琪噚日出席亞視新劇《危險人物》嘅記者會，佢話會演出其中一個單元《一代賊王》，演賊王嘅女友，重要係盲妹一名，家琪話對佢嚟講都幾有新鮮感，唔使成日做埋同類型嘅角色。佢又話之前去咗泰國拍旅遊特輯，問佢當地情況點？佢話：「其實都OK呀，不過就冇乜亞洲人，有好多俄羅斯人，我重俾佢哋撩。」
蓋鳴暉噚日到青衣出席「公益金慈善遊樂園」開幕儀式，蓋鳴暉嘅鳴芝聲劇團會喺農曆年初七為公益金舉行一場慈善演出，一向熱心做善事嘅蓋鳴暉就同馮仁昭講：「其實農曆新年，我會做十八場表演，當中有唔少係為唔同機構做善事，希望大家到時都多啲支持啦。」
