日前，《泰晤士報》選出足球史上嘅十大惡人，當中有四名現役球員，有鐵漢之稱嘅堅尼同沙維治分列二、三位都好正常，以前踢車路士嘅韋斯排第六，但係第八位嘅「雲佬」同第十位嘅比拿美入選就有啲「無厘頭」啦！退役惡人方面，八二年世界盃撞暈巴迪斯達嘅德國門將舒麥加排頭位，曾攻擊加斯居尼「要害」嘅「狂人」鍾斯排第四。最出奇嘅係馬勒當拿居然排第五，睇嚟當年嗰吓「上帝之手」，英國人重係含恨在心，認真小器。
《泰晤士報》作風保守，今次選舉亦唔例外，如果唔係近排麻煩多多嘅朗尼點會冇份吖？之後，重要搵個專欄作家寫一段文章，話嗰啲惡人其實喺球場外都係好人嚟嘅。哎！使唔使咁兜番呀！
今日係馬甸尼足球生涯嘅第二十年，我求大俠喺度祝「小馬哥」愈踢愈勁。日前，佢承認自己曾經有過離開AC嘅想法。話說當年米蘭喺後巴里斯時代出現過低潮，當時車路士領隊維埃里搵佢過檔，佢表示自己喺嗰幾十秒有過心動。其實，人望高處，AC球迷又點會怪責佢呀！
英國《太陽報》日前登咗張夏斯玩websex嘅猥瑣相，話說呢位最近被西布朗棄用嘅瑞士後衞，可能因為留喺屋企冇世藝，當佢用一百英鎊幫襯色情網站應召服務時，情不自禁控埋鏡頭前啜嘴，結果被拍低。夏斯事業唔如意，家陣又大出洋相成笑柄，呢鋪真係代表作囉。
費格遜同雲格兩個大男人嘅罵戰，嘈到連差佬都頂唔順要發警告，要兩條友即刻「Shutup」。據講當地差佬擔心繼續嘈落去，會引發球迷之間嘅衝突，製造不必要嘅麻煩咁話。原來，差佬對嚟緊阿仙奴對曼聯嘅比賽非常緊張，話會派出一百八十位夥計，比平時多出一倍有多。
早前戰績高踞不下的太陽，喺主將尼殊傷出後已連輸四場；本來已經黑仔。點知喺日前的練習，預備復出嘅尼殊又拉傷背部肌肉；連後備控衞巴布沙都踩到尼殊腳面「拗柴」。雖然兩個人都唔算傷得嚴重，但已令太陽唔多夠控衞；我求大俠建議，不如搵田臥勇太返嚟幫手啦！