由日本男星瀧澤秀明孭飛嘅日本NHK大河古裝劇《義經》已經播出，近日有日本報章爆料指劇中童星神木隆之介嘅演技非常出色，令到瀧澤精神壓力大增，情況令人擔心。
據日本報章《東京Sports》報道，呢位十一歲嘅小童星神木隆之介，兩歲已經出道，拍過《巨星夫婿》等唔少日劇，𠵱家同上戶彩合演新片《Install》。而喺《義經》入面，隆之介扮演瀧澤飾演嘅義經童年角色。據現場工作人員爆料，隆之介拍攝嗰陣好多時都係一take搞掂，獲得工作人員大讚。相反瀧澤就因為經常唔記得台詞，或者被彈唔夠氣勢而頻頻NG，令佢感到唔少壓力，搞到近日瀧澤喺片場上面色唔多好，面上除咗少咗笑容之外，重有對超大黑眼圈，工作人員都好擔心瀧澤有朝一日會捱唔住。
除此之外，幕後人員亦表示，由於上一輯由師兄香取慎吾主演嘅大河劇《新選組！》收視未如理想，所以如果今次瀧澤唔能夠取得高收視嘅話，有可能會影響將來其他尊尼事務所藝人參演大河劇嘅機會，難怪瀧澤笑唔出。而尊尼事務所就承認瀧澤有壓力，但就話佢身體好好，叫大家唔使擔心。