個市一開，似模似樣，早段曾升97點，但下晝開市冇耐只升10點，最後捱吓捱吓到收市有升幅74點。啲錢似乎再流入市場，短期內可以再睇好啲。
長實C輪4471：長實（001）餓土地儲備，連將軍澳地皮都唔放過，奪將軍澳86區夢幻之城首期項目。市場收貨，長實彈出，早段見73.50元，升1元，下晝曾經反跌，埋單價73元，升0.50元。長實搶地，如果股價下跌，可能會俾人覺得買貴地，做冤大頭，冇眼光，冇面子。賭面子因素，長實應該睇好。
睇好長實，揀C輪買，最佳對象係4471，8月到期，時間價值好高，輪價42.5仙，溢價5.7%，槓桿率17.2倍（有效8.6倍），引伸波幅21.9%。有隻稍冷嘅長實C輪3504，亦可望多兩眼，5月到期，輪價55仙，溢價3.4%，槓桿率13.3倍（有效7.9倍），引伸波幅28.1%，數據相當吸引。
新地C輪4643：長實有睇頭，新地（016）亦唔會失禮。新地上月底77.75元，上禮拜最低見70元齊頭價，昨收72元，大市氣氛好番，短期內上多一兩蚊冇乜難度，買啲新地C輪有着數。
主角係4643，6月尾夠鐘，輪價52仙，溢價4.4%，槓桿率13.8倍（有效8.1倍），引伸波幅25.7%。配角係4567，壽命稍着數，溢價則輸蝕。
恒地C輪3609：恒地C輪最多人買賣嘅係3609，年底到期，輪價13.9仙，溢價22%，槓桿率26.1倍（有效7.3倍），引伸波幅26.4%，咁嘅溢價都幾蝦人買。但正股睇好，亦可細注短炒，不過坐盤咪坐得太耐。
章盛