《蘋果日報》日前刊登一段新聞，話如果香港學制推行三三四，好多學生會提早留學英國；又有一段新聞講一位父親務求個仔小一派位派入喇沙，已用咗百幾萬（唔記得在九龍塘區置業還是租樓），聲言如果入唔到喇沙，就會送個仔去英國讀書。
左丁山睇咗，幾乎笑到噴飯。啲有錢家長、有納稅人津貼嘅公僕，如果要送子女去英國讀書，幾時都得啦，使乜搵三三四學制做藉口，今年暑假就可以立即鬆人，無謂留響香港受教統局「逼害」。英國學校都唔知幾想收香港學生（最一流者仍然收生好嚴），中學如是，大學如是，因為英國學校好似香港一樣，俾政府削資，唔夠資源，要收多啲外國學生嚟津貼番本地學生也。
星期日馬場之內，碰到幾位完全唔識跑馬嘅教授，於是唔講馬，講教育。教授話自從九一一之後，美國發癲咁收緊簽證，搞到好多外國學生入唔到境，美國大學研究院啲研究生數目大跌。有心留學而攞唔到美國簽證嘅學生就改去英國、加拿大、澳洲，尤以英國最受歡迎。各位香港有錢家長，送子女去英國，請趁早，唔好等到二○○八年三三四學制推行呀！至於話入唔到喇沙就要鬆人嘅家長，快啲走啦，百幾萬銀夠去英國讀書好多年㗎嘞。
推行三三四，無非係為香港教育好，想唔到會成為某些人送子女去英國嘅口實。李國章局長讀完聖保羅男女中學中五後先至去英國，佢嘅同班同學中文大學校長劉遵義就去美國，呢兩位大教授嘅兩文三語好掂，自細就去英國嘅學生，九成唔會識中文，大大限制咗前途，請啲家長唔好拿子女前途開玩笑！