大市回氣後再上，向短期反彈目標13700至13800區域推進，收市恒指13678，升74點，成交再增，有182億元，但期指尾段轉弱，收13638，升53點，低水又擴大到40點。
「濠」股分開兩截，大價股升勢凌厲，仙股沽壓都幾重，睇樣重要消化。大價股最勁都係隻結好控股（064），升破3元大關後，再一輪衝鋒，掃到上3.50元最高收，大升0.65元，升幅22.8%，成交亦大增到6300多萬股，噚日先話呢隻股有幾條線嘅盤在收集，估唔到好戲咁快就上演。
嘉華建材（027）重上7元大關，收7.15元，升0.65元，升幅10%，大股東一日未落實會否注資，一日都會係咁大上大落；信德（242）同新濠（200）亦分別有5.6%同4.3%進帳。至於東方明珠（600），由低位0.90元掃番上1.01元收市，升6.3%。
剛宣布中期業績嘅滙多利（607），聽講正同美國一著名電器品牌傾緊單大生意，成事機會係99%（即係極大），過年前可落實公布。該品牌每年畀滙多利嘅柯打會以億元計，冠上品牌的電器消費品，將會銷售中國及海外市場，唔排除日後雙方會加強合作，入股的可能性亦不容抹煞。
滙多利主要從事家居電器設計、製造和銷售，業績增長穩定，05年度（4月年結）的上半年，營業額1.33億元，升24%，獲利2973萬元，升15%，每股盈利7.05仙，升1.8%，中期派息1.5仙，升25%。
傳統產品如電風扇及對流式電暖爐營業額9900萬元，升8.7%，充油式暖爐及新推出的石英暖爐營業額2030萬元，更大增97%，而鮮風交換機亦打開市場，收入680萬元。雖然原材料價格上升，但集團以垂直模式生產，大大減低分判承包工序之開支，致使毛利率仍能維持在43%以上的高水平。
為配合市場需求，新廠房將於4月完成並投產，屆時生產力可增加50%。
05年度，估計集團盈利可達7000萬元，每股盈利16仙，PE7.1倍。06年度，鮮風交換機提供更大貢獻，新產品如MP4及一系列的戶外式暖爐亦可刺激盈利增長，PE下調到5至6倍，中線股價可升越1.23元，再創新高。
郭兆誠