港台DJ麥潤壽的母親昨日中風病逝，麥母近年患了老人癡呆症，去年曾突然失蹤，幸好最終能母子團聚。麥潤壽慶幸母親死時很安詳，不用受病魔折騰，但卻遺憾母親未能看到他完成碩士課程。
港台DJ麥潤壽的母親因患了老人癡呆症，去年年廿七突然失蹤，麥潤壽四出尋找始母子重聚，事件獲傳媒廣泛報道。豈料麥母昨午因中風逝世，享年七十八歲。
麥潤壽昨日在電話中說：「媽咪噚日朝早昏迷，我打電話叫救護車送佢入醫院，救護人員都話媽咪嘅腦幹衰竭，只靠儀器維持呼吸，佢捱到今日中午終於走咗，好多謝媽咪陪咗我五十年。」麥潤壽已接受母親離開的事實，並開始收拾心情為母親辦理身後事。
問麥潤壽對母親病逝有何遺憾，他說：「基本上有兩個心願，一個已經達成，就係媽咪走得安詳，唔使喺病床上捱苦。至於另一個未完心願，就係我唔可以同媽咪一齊影畢業相，我嘅碩士課程要五月先讀完，年底先至可以影畢業相。」
麥潤壽表示母親患了老人癡呆症去年曾走失，他說：「我會更識遷就佢，好似有時驚佢會唔記得我畀佢啲錢放喺邊，所以我索性叫佢用我擺喺工人度張信用卡，識得咁遷就媽咪，佢脾氣都好咗，我哋亦關心佢多咗。」
麥潤壽昨日獨自到紅磡世界殯儀館，為亡母辦理身後事，已訂於下月五日設靈，翌日出殯和火化，採用佛教儀式，他說：「我呢幾日工作會暫停，但下個星期就會一切如常，始終跌倒要盡快企起身，唔開心要盡快忘記。」
此外，麥潤壽慨歎三歲喪父，自此從未間斷跟母親同住。麥潤壽曾表示從未慶祝過父親節，現在母親亦離去，再不能一起過母親節。
採訪、攝影：比華利、李珮洳
