經紀黃果然冇睇錯，裕元集團（551）業績較預期為差，噚日股價應聲下跌，最低見過20元，收20.60元，跌5.5％，成交股數1275萬股，金額2.62億元。裕元雖然係藍籌股，好彩所佔嘅比重唔大，對恒指冇太大影響。
同樣係波鞋股，而裕元亦係股東之一的新灃集團（1223），雖然大家都預佢04年業績唔靚，會倒退得頗多，但偏偏有唔少大行力撐話買得過，股價近日穩步上揚，噚日又升5.56％，收1.71元，成交股數高達5305萬股，金額8873萬元。
經紀黃話，新灃呢期咁受基金歡迎，一來係因為佢股價較便宜，二來係預期原材料價格下調，將可受惠，而最重要係今年會成為Reebok的採購同埋生產商。據講Reebok今年將在內地大展拳腳，亦會成為新灃的盈利增長動力。
經紀黃又話，早兩日新灃曾出現大手成交，江湖傳聞係有星洲芬佬買入。雖然新灃呢排升幅唔細，但班芬佬長線睇2元以上，若果見新灃股價回落，可以諗一諗。
慕容小初