日韓興啲乜：最新購物中心SPACE9<br>遊客掃電子產品有7折

日韓興啲乜：最新購物中心SPACE9
遊客掃電子產品有7折

喺韓國買電子電器產品，一定要去龍山電子商業城，此區就如香港的旺角同深水埗，是韓國專營電子產品最大規模的地方，佔地80多萬平方米，二十多個大型商場內有數千間店舖售賣電子影音產品。這電子商業城最近又再添丁，去年10月有一座名叫SPACE9的綜合商場開幕，提供多元化的購物及消閒場所，就算唔想睇電子用品都一樣啱行。

記者：張銘恩　攝影：陳陶鈞
鳴謝：韓國觀光公社（25238065）

購物中心附空中花園

SPACE9位於龍山，是附近一帶最多元化的綜合購物中心，中心設計由多座建築物組成，全部互通，行起嚟一啲都唔覺得麻煩。商場主要分數碼產品、時裝、影院及食肆，另外亦有唱片舖、髮型屋、精品店及銀行等，一家大細各有各Shopping，一啲都唔會悶，現時商場內仍有一些店舖在加緊裝修，預定於今年4月全面開業。
行咗幾粒鐘，心血來潮想吸啖新鮮空氣，商場7樓有出口可直通露天花園，踏足這空中花園，感覺與商場之內截然不同，出嚟休息兼舒口氣簡直一流，而且在花園可俯瞰商場正門對開的露天廣場，露天廣場久唔久又會搞嘉年華節目，想搵靚位觀賞節目，不作他想。

■SPACE9外形帶點科幻，而面積特大的露天廣場則多於假日舉行嘉年華等活動。

■商場開幕不久，周圍仍可見到寫上「GRANDOPEN」的紙牌。

■以宇宙和天體為設計主題的SPACE9，門口有這個十分貼題的「CyberinSpace」機動遊戲，免費試玩。

■空中花園格局清雅，行到悶悶哋出嚟坐吓都唔錯。

遊客出示護照畀現金攞着數

SPACE9大部份商舖售賣手提電話、電腦、影音產品、家庭電器等電子產品，韓國本地牌子及外國入口的品牌都可以搵到，價錢比龍山以外的地方便宜一點，最正係可以講價。特別提醒大家一句，某些店舖會以免稅價賣貨給遊客，當中差額可以高至7折，不過購買前要出示Passport，而且只收現金，如果大家想以最低價掃貨的話，記住要帶Passport，銀包要擺定多啲韓圜。

■商場主打電子產品，有心格價肯定有排行。

■SamsungKenoxa5扭芒500萬像素相機，除稅後約$3,880。（86舖號）

■店主推介韓國本地薑QooLqeeMP3機，可存相，除稅價256M售$1,343、512M售$1,866。（85舖號）

■香港熱賣韓國JNCMP3機，要留意當地內銷貨唔叫JNC，叫Woodi，除稅後512M約$1,600，比香港約平$300。（85舖號）

CGV影院攞免費紀念品

另一必行點係CGV電影院，播放的影片非常新，至少周星馳的《功夫》比香港更早放映，睇場戲約$52，免費申請會員證後會有多種優惠，如睇戲儲分攞免費戲票、進入只招待會員的戲院Cafe用膳，身為遊客嘅你一樣可以申請，就算唔申請都唔好掂行掂過，攞番啲電影宣傳品返香港做紀念都好。

■《功夫》、《哈爾移動城堡》明信片、單張等紀念品任攞。

■做會員證專區非常Cyber，歡迎遊客申請。

女士修甲有半價

男友埋首電子產品，好多女士都無興趣，一於各有各Shopping！除固定時裝店舖外，3樓的商場通道有唔少流動攤位，貨物價錢比固定舖位平，Shopping完重可以去QueenNail（614-B舖）修個靚甲，校啱下午兩點前幫襯更有半價優惠！

■除修甲（手部$90，腳部$150）外，QueenNail還有按摩等美容服務。

■流動攤位價錢較平，各類毛毛冚耳帽，一嚿水有交易。

FoodCourt食物種類多

SPACE9餐廳種類唔少，傳統韓式火鍋店、美式餐廳、法國菜館、甜品店等梗有一間啱心水。若然同朋友夾唔到口味，筆者提議大家齊齊去FoodCourt，美食廣場有二十多間食店提供不同風味的食物，而質素同賣相都非常唔錯，大家點啲唔同種類食物一齊Share就啱晒數。

■美食廣場面積夠大，唔使霸位。

■清水無限量供應，飲完記住將杯子放入底部的回收箱。

■螃蟹沙律壽司，頂部有鮮嫩蝦仁加惹味沙律醬，$56。

■唔想食太多肉，就一定要試大伴菜冷麵，醬汁超正，$37。

SPACE9

地址：漢城市龍山區漢江路3街40-999
電話：（82）2-2012-0099
網址：www.space9.co.kr
交通：乘地鐵1號線到龍山站落車，跟指示步行10分鐘即到。
註：以上為貨幣兌換約數，$1兌134韓圜。