數碼影音：蓋茨、消委會齊捧<br>iriver睇相聽歌一味靠捽

數碼影音：蓋茨、消委會齊捧
iriver睇相聽歌一味靠捽

MP3機容量愈玩愈大，不過下下拎住幾十GB嘅MP3出街，隨時環遊地球一周都未聽得晒，所以「小小哋」5GB更合乎普羅大眾嘅需要！而近期由消委會點名讚好嘅iriver，新機H10除內置5GB容量之外，更備有26萬色靚芒。而且操作全靠手指向上捽向下捽，夠晒創意！唔單止消委會都評iriver為第一品牌，甚至連蓋茨（BillGates）都要拎住佢招搖過市！

記者：劉耀祥　攝影：陳偉強
ImageGirl：Samantha

PROFILE

容量：5GB
支援檔案：MP3、WMA、VBR、JPG、TXT
顯示器：
1.5吋（26萬色TFT）
功能：FM收音機、錄音
電池：可拆式鋰電池
播放時間：約12小時
iriverHK
查詢電話：25582166

呢部H10來勢洶洶，未推出時已經成為全球IT界嘅風頭躉，原因就係喺今個月頭，於美國拉斯維加斯舉行嘅消費者電子展（CES）上，微軟主席BillGates講到MP3機嘅時候，就突然拎住部H10俾全球傳媒任影唔嬲，一時間全世界都睇住呢部H10。查實BillGates點解要拎住部H10（上年都係拎住部iPod）？原來H10係全球首部支援微軟嘅「PlaysForSure」功能，因為部份美國音樂網站係逐隻歌收錢，為避免Download咗之後冇得聽嘅問題，所以跟住呢個Logo，就保證下載之後一定可以喺H10播放。

$2,380
■H10有四款機身顏色，男又啱女又啱！

■創新操作方式，就係呢個上上下下嘅TouchPad。

■支援自家「PlayForSure」，梗係要拎住俾大家影番張相。

■H10乃全球第一部支援「PlaysForSure」功能之MP3機。

15mm機身厚度

其實H10唔係淨係靠同BillGates影咗張相先受到全球注視，就算係H10本身都已經好有TalkingPoint。首先最搶眼嘅就係機面長條形TouchPad，事關機內所有關乎向上或向下嘅操作，都靠晒呢個TouchPad，操作比起用圓形TouchPad，手指公唔使下下喺度「兜圈」，已經慳番好多指力。而TouchPad旁嘅退出同確認掣，玩起上嚟都方便，加上機身厚度只有15mm，就算小朋友手指都夠長！雖然TouchPad可以調校敏感度，不過初時使用都會發生「唔到位、走過龍」情況，用家要慢慢習慣。
除此之外，其他按鈕都安排於機身左右兩側，令機面觀感更為簡潔。四種機身顏色亦算多選擇，男男女女都可以搵到啱自己嘅顏色！

■機身體積唔算大，兩張CF咁上下。

■其他按鈕都設於機側，保持機面簡潔感。

■開關掣設於機身左側，操作都幾方便。

睇相又睇電子書

無論係硬件定軟件上，H10亦都十分出色，除TouchPad之外，亦用上1.5吋26萬色TFT彩芒，唔單止睇歌名時更加順眼，更支援睇相及文字，一於做埋電子相簿及睇埋電子書！使用上H10亦都UserFriendly，用家可以直接放入JPG格式圖片，毋須將圖片格式左轉右轉先有得睇。而iriver嘅MP3機，音質一向都受到用家評為好聲一族，H10亦都冇令人失望，支援SRSWOW環迴音效，以每邊耳筒18mW嘅輸出功率，聲音質素非常出色，就算係重低音環境之下，仍然可以聽到背景之結他聲，聽歌時，人聲及音樂都清晰分明，唔會話「揦」埋一嚿得個嘈字。