噚日講過萬人期待嘅iPodShuffle，今日就以個人使用經驗，分析一下iPodShuffle嘅優劣。雖然今次蘋果電腦將硬碟改為FlashMemory作儲存媒體，不過一出手就係512MB同1GB大容量，以震撼超筍價搶盡目光。試諗下，市面一條512MBUSB手指都接近五百大元，若果兼具MP3播放，又或有啲名氣者，分分鐘$1,500走唔甩。唔將128MB等「細奀嘢」先試市場，此乃衝擊成功第一着。
隨意人生聽歌有驚喜
第二個成功之處就係其包裝手法，為大幅壓低成本，iPodShuffle不設屏幕，網上就有好多人不滿呢個設計，大拿拿1GB音樂，真係唔知播到邊度，又或忽然想聽某個專輯，要搵番都幾辛苦。其實喺上星期Macworld會場，四周擺放嘅巨型宣傳海報上，已經重點講咗句「LifeIsRandom」口號，即係人生充滿隨意，唔使下下刻意揀歌聽啫！呢下包裝認真高，而且並非死撐嚟抬高低價產品，因為跟機送嘅新版《iTune》（4.7.1.30）新增一個「AutoFill」功能，每次連接iPodShuffle後，都以隨機方式選歌，幫你填滿記憶體為止，到底有乜歌你係完全唔知情嘅！呢種軟硬件配搭嘅Random效果，唔係咩高科技玩意，不過就標明蘋果電腦嗰種新鮮概念、真正用家為本嘅吸引力。試睇吓市面一眾國產平機，一味割喉價，賣相恐怖兼成日撞Software，證明抵玩同Cheap係兩回事。平心而論，無芒的確唔方便，個人較推薦512MB型號，聽歌抄File兩邊都夠用又平啲。
絕配純白PS2
筆者近排狂煲PS2《GT4》，好想玩個PhotoMode，影靚相做Wallpaper，好彩部iPodShuffle唔使Driver都對應到，所有靚相都可抄返電腦度用，最重要係跟屋企部白色PS2簡直係絕配，一邊抄《GT4》靚相順便充埋電，正！最後一提，iPodShuffle跟其他iPod不同，唔會預設Partition畀你分開音樂同電腦檔案，初入手時WindowsXP唔會當佢係一個外置式儲存裝置，換句話講即係唔可以抄File。用家需先經新版《iTune》，設定iPodShuffle音樂同檔案嘅存放比重，之後就可以當USB手指咁用喇！
記者：徐影龍