油王阿巴莫域治「魔爪」準備伸入西甲聯，買起甲組隊拉科魯尼亞，誓要打破皇馬、巴塞及華倫等近年壟斷該國及歐洲錦標嘅局面，呢次真係有好戲睇嘞！
拉科魯尼亞球會主席蘭多爾路日前承認，有俄國人士欲收購該會，言談間暗示到呢個人就係「車仔」嘅老細阿巴莫域治。我求大俠都好希望呢單料係堅嘅，到時唔再淨係皇馬及巴塞有錢買人，多間球會出嚟同佢哋爭吓，爭標形勢刺激啲，我哋球迷自有眼福！
查實拉科今季愈打愈沉，上周聯賽主場打和榜尾紐文西亞後，九場不勝，俾主場球迷噓到暈！一眾主將如查斯坦、彭迪安尼同安達迪等「無貨賣」，球會又窮到無錢買人，真係好需要一啲新衝擊。
英超聯球會中，阿仙奴都算孤寒，佢哋最近就下令球員只可以喺足總盃同歐冠盃賽事同對手換球衣，事關佢哋喺今季已經用咗超過二百件球衣，係贊助商Nike畀佢哋球衣數目嘅四分三，而聯賽只不過過咗一半，為咗唔想出錢買球衣，咪惟有下令球員唔好喺聯賽同對手交換球衣囉！
下月喺都柏林上演嘅話劇《我—堅諾》，劇本以○二世界盃堅尼同領隊麥卡菲意見不合被趕返屋企一事為藍本，講述塞班島一名古羅馬士兵堅諾（堅尼），向將軍麥卡達古斯（麥卡菲）表達不滿，最終發生衝突。導演話佢拍呢套戲係為咗治療愛爾蘭人因嗰次嘅衝突導致嘅創傷。
「波地係英雄地」，但係輸波賠埋條命就認真悲哀啦！貝寧二十一歲國家隊門將薩米烏喺非洲青年錦標賽對尼日利亞嘅比賽中失咗三個波，賽後當晚，佢喺酒吧俾球迷監生打死。呢次事件，令人記起一九九四世界盃後，被槍殺嘅哥倫比亞後衞艾斯哥巴。我求大俠祝佢哋喺天國安息啦！
想當年小笠踢波時都好受愛戴呀，唔知點解𠵱家個個見佢好似見鬼咁，走夾唔唞。過氣阿根廷國腳艾美達原準備簽紙加盟，唔知係咪見隊波愈嚟愈唔掂，嚇到話要留喺阿根廷退休。艾美達話自己係家庭理由先寧願喺阿根廷養老啫；其實，明眼人都知佢係嫌棄小笠嘅球隊戰績差！