經紀黃的至愛工業股龍頭裕元工業（551）噚日公布截至去年9月止全年業績，盈利雖然有成3.03億美元，兼有末期股息46仙派，但純利比去年下降1.6%，比較叫人意外，睇嚟今日股價唔慌好睇。
經紀黃話，事前好多分析員估計，裕元盈利大概有24億至26億港元之間，今次略低於下限，確係叫人有多少失望。雖然工業股普遍受到原材料價格上升等問題影響，但好多分析員諗住裕元出售母公司寶成工業股份套現，有唔少特殊利潤，應該可以拉上補下，但原來事實唔係咁。
近期市場憧憬裕元業績靚仔，股價由20元升上22元水平，噚日可能有春江鴨收到風，股價下跌0.9％，收21.80元，成交股數209萬股，金額4556萬元。
另一隻泳衣股德發集團（928），在歐資證券行力推下，噚日升5.7％，收0.92元，成交股數1346萬股，金額1235萬元。歐資行睇好德發，主要係睇好佢收購嘅少女服裝品牌Mudd的前景。
慕容小初