吳文忻噚日以「馬爹利醇酒美人品味之星」身份到新蒲崗宣傳，重坐住架開篷勞斯萊斯到場，認真架勢！原本張文慈同康華都係嘉賓，不過張文慈肚痛嚟唔到，康華就臨時甩底，剩番吳文忻一個獨擔大旗，衣着性感嘅佢重俾個飲醉酒嘅男人調戲！
其實身穿低胸露背裙嘅吳文忻到場時，已經俾三十幾個男人圍住望，點知有一個攞住支酒，一睇就知有醉意嘅阿叔，突然走近吳文忻，工作人員見狀當然攔住佢啦，點知醉漢繼續大叫：「咦，靚喎！」重唔理三七二十一愈企愈埋，見記者影相，重笑住作狀要揮拳打人㖭，場面都幾搞笑。後嚟吳文忻獲贈頸鏈同大合照時，醉漢又企埋去阻住人，文忻上車離開，佢又好熱情咁同文忻講拜拜。
事後吳文忻話現場有咁多人，所以唔驚，重話試過有癡心女fans攬住佢錫，男嘅就冇咁大膽，最多係想扯佢落台。
陳啟泰同陳煒噚日喺亞視出席《百萬富翁》記者會，呢個節目會喺農曆新年時推出五集藝員特別版，到時五十位藝員有機會攞到百萬獎金過肥年。由於陳啟泰要主持大局，所以冇得做參賽者，佢話：「聽到呢個構思都好開心，而《百萬富翁》完結後我會休息好耐先接工作，到時我可能頭髮白晒。」
何韻詩同劉浩龍呢對過氣緋聞情侶噚日分別接受港台同商台訪問，阿詩大爆劉浩龍攞獎時，唔敢喺佢面前表現得太開心，因阿詩會鬧佢，阿詩重話自己嘅性格可以壓住劉浩龍㖭！馮仁昭轉頭問劉浩龍時，佢就話阿詩性格霸道，但就係出於關心啫。
獲委任為「浙江旅遊大使」嘅曹眾，噚日去咗沙田宣傳，重大派平安符畀巿民。曹眾話因為自己喺杭州出世，溫州長大，𠵱家除咗做浙江旅遊大使外，重係溫州政協委員，所以佢近排主要係幫手宣傳旅遊業，話畀浙江人知香港有幾好玩，有好多好嘢買。
不過嚟緊曹眾就會做番演藝工作，拍攝一部北京電影。
蕭薔同林佑威噚日喺台灣幫火鍋店宣傳，重騎馬上陣。講到蕭薔嘅名最近被色情場所利用嚟幫應召女郎宣傳，佢用國語話：「我不好意思向他們收廣告費，以後乾脆報警。」而蕭薔日前接受黃子佼嘅電台節目訪問，有聽眾打電話向佢示愛，話覺得佢以前啱做情婦，𠵱家就啱做老婆。
