大市反彈力度未能持續，噚日早段回落之時，恒指最低曾見13489，一度下跌過百點，午後行情轉穩，跌幅收窄，收市恒指13604，跌17點，成交增加，有170億元。上升股（不計認股證）有350多隻，遠比下跌股為多。
國企相對較強勢，國指收4646，升29點，原料股重繼續有追捧。中國鋁業（2600）高收4.375元，升3個位；鞍鋼（347）尾市掃4.325元，升0.1元，升幅2.3%；馬鋼（323）同江西銅業（358）都有1個位進帳。原料股升勢初起，仍可看好。
「濠」股個勢又返嚟，最突出係和成國際（651），高收5仙，升19%。嘉華建材（027）大上大落，噚日又升番0.6元，升幅10%；結好控股（064）一直都見有幾條線嘅盤在收集，收2.85元，升2.7%，下禮拜睇好戲。上海策略置地（164）波動亦好大，早段搶上7.9仙，午後質到落6.7仙，收7.2仙，仍升1個位；睇盤路，當落到7仙水平時，就見到幾間大行嘅買盤撲出嚟接貨，相信又係基金增持。家吓上策置地話事人係美國賭業基金，聽聞正斟緊一單大「刁」，若然成事，股價勢會三級跳，甚至翻幾番都有可能。
噚日推介嘅蜂林（8156），冇升跌，成交只有140萬股，貨源唔多，收集要幾有耐性。另一隻中線對象係泰山石化（1192），呢隻就好熱鬧，容易轉身，而且又有大行推介，中線可上番1年高位1.20元，預計升幅有50%！
泰山主要做石油運輸、倉儲同貿易，經過連串的收購後，目前的船隊規模已達25艘油輪，其中超級油輪有5艘，連同早前以7800萬美元訂購的兩艘超級油輪，船隊的總載重量將逾180萬噸。
石油運輸係集團盈利主要來源，但在目前致力發展的倉儲項目完成後，倉儲業務所佔的盈利比重將會顯著上升。公司正在南沙興建石油倉儲，投資10億元人民幣，佔45%權益，預期2006年上半年可投入服務；另外，集團亦計劃在上海和福建，興建大型石油倉儲設備。
中國內地耗油量不斷增長，泰山的生意客戶多係大企業，合約亦係長期性，盈利有保證，大行睇中，日後必有大作為，值得憧憬。
郭兆誠