阿趙逝世，長毛即時提出立法會默哀，俾范太大番轉頭，話阿趙同老鄧唔同斤両，老鄧瓜咗，立法會就可以默哀，阿趙只不過係一名執行人。言下之意即是二打六，因此冇資格享受長毛動議嘅立法會默哀大優惠喎！
呢個世界，人一死，個個反面唔認！大佬，阿趙生前做總理嗰陣，身光頸靚，坐喺中南海，香港地唔少工商界上京見到佢，都打恭作揖，嗰陣時排隊打尖，擔凳仔都想霸番個靚位，但求俾阿趙眼尾掃一掃，都開心到好似做咗新郎哥，阿趙失勢兼軟禁，個個掩住個鼻惟恐走避不及，都咪話唔現實！
呢嗱，好似合和老細胡爵士咁，當年佢生怕九七共產黨嚟，當佢係階級敵人，將佢啲家產充公兼罰跪玻璃，佢親自上北京拉老趙衫尾，問老趙：自己係咪階級敵人，老趙話唔係，重話日後投資有乜唔掂，可以直接搵佢，收尾阿趙真係幫胡爵士做咗一趟收數佬喎！
阿趙有咁大恩於香港某啲有錢佬，咁飲水思源，人哋咁樣收場，工商界係咪應該聯名登番個廣告又好，講嘢哀悼兩句又好？雖然係你共產黨啲家事，不過係咪世間上點都有少少人性同人情味，人哋都冇當你係階級敵人，你就當人係陌路人？
正所謂時窮節乃見，阿趙可能估都估唔到，佢生前照起過嘅香港有錢佬，十五年冇一個人探過佢，送過一盒人參，死後更係耍手擰頭扮唔識，爭住劃清界線！早知係咁，阿趙不如嗰陣時親切接見吓少年長毛，齊齊研究吓哲古華拉理論用埋點樣深化世界革命，將啲有錢佬共晒產，跟住一齊飲茅台，攬頭攬頸結拜兄弟！
港澳辦左耳陳，加把口撐范太！唉，咁得閒，左耳陳幫手昅實吓廢董嘅「扶貧委員會」，睇吓幾時會車毀人亡重好喇！
傳真︰2623-9278
電郵︰