港股輕微回吐，恒指跌17點。內地有新聞話唔准官員賭錢，又唔准國內人碌卡換籌碼賭錢，新聞有啲舊舊哋，濠賭股冇受影響，好幾隻重有唔錯表現，意味人心漸穩，後市冇必要睇得太灰。有平貨，就要諗吓收集。
平保C輪4535：國企指數有進帳29點，仍有8隻成份股下跌，拖得國指最多嘅係中石化（386）與平保（2318）。佢哋嘅同類股中石油（857）與國壽（2628）則有得升，估計佢哋有機會跟番大隊上番些少，趁低位買啲相關C輪。
平保C輪，揀4535，3月尾夠鐘，輪價72仙，溢價4.1%，槓桿率17.8倍（有效10.4倍），引伸波幅27.1%，隻輪溢價唔算特別吸引，上車後咪揸得太耐，提防溢價收縮。另1隻平保C輪4495，條件其實更佳，不過交投唔夠。4495喺3月中夠鐘，輪價11.8仙，溢價2%，槓桿率10.8倍（有效8.1倍），引伸波幅31%。
中石化C輪2240：博中石化彈番上去，買些少中石化C輪2240。真係只能買些少，因為隻輪交投唔多，其他啲又冇得揀，唔係交投更疏就係數據更加唔靚。
2240喺4月中到期，輪價26.5仙，溢價5.7%，槓桿率11.2倍（有效6.8倍），引伸波幅36.7%。2130條件更佳，但零成交，買難賣難。
中信C輪4483：好多紅籌有睇頭，股價郁郁吓，中信泰富（267）唔得，收20.75元，跌25仙。如果再跌啲，撈C輪4483博反彈，隻輪10月到期，輪價15.5仙，溢價8.1%，槓桿率13.4倍（有效6.3倍），引伸波幅28.8%。
章盛