南亞海嘯賑災香港人善心爆棚，廉署上星期五都搞咗個籌款晚會，成功籌得超過四十三萬。
晚會上廉政專員黃鴻超同廉記各部門首長包括執行處首長李銘澤等，首度齊齊大開金口，獻唱《滔滔千里心》。其他一啲獻唱歌曲都籌到成萬蚊，好似社區關係處處長許林燕明、有「廉署女神探」之稱嘅執行處助理處長李寶蘭，同藝人梁榮忠跟同事合唱《相思風雨中》；防貪處處長陳志新跟同事合唱《愛》；重有執行處處長李俊生獨唱《戲劇人生》等等。
喺拍賣物品籌款環節，廉署員工各自捐出珍藏供競投，其中李銘澤投得一枚1894年一毫硬幣，同一張1974年（廉署成立年份）有利銀行一百蚊紙。
參演廉政劇集《廉政行動2004》嘅影帝黃秋生，知道廉署嘅籌款活動後，亦喺幾張《廉政公署三十周年紀念光碟》上簽名，重透過錄影片段呼籲捐款。
其他別出心裁嘅拍賣品重包括，執行處助理處長陳礎強捐出一張1848年英國倫敦八個住宅單位嘅買賣契約。
（圖）廉政專員黃鴻超（左三）同執行處首長李銘澤（左二）等一眾首長級人員合唱《滔滔千里心》，為南亞海嘯災民籌款。 廉署提供照片
傳真︰2623-9278
電郵︰