日韓興啲乜：<br>老竇小時侯懷舊餐廳似博物館

日韓興啲乜：
老竇小時侯懷舊餐廳似博物館

「咦，啲玩具咁舊，丟咗佢啦！」「嘩！𠵱家重邊有人睇呢啲書㗎，丟啦！」有人當垃圾，又會有人當係寶，一樣二樣舊嘢集合起來，其實都可以大有作為。位於安國呢間只有韓文名字的餐廳，店名意思係「老竇小時候」，全店以六、七十年代的絕版舊物件做布置，餐廳何止有得食，簡直變埋可以參觀的歷史博物館。

記者：張銘恩　攝影：陳陶鈞
鳴謝：韓國觀光公社（www.tour2korea.com）

1.木橫樑下掛了如LeeSunHee等80年代當紅韓國歌手的黑膠，下面則放了絕版影相機。
2.阿爺年代無按鈕的電話！點打？攪動旁邊的手掣，跟住就會有接線生幫你搭線。
3.牆上滿布客人留言，一件70年代韓國校服，胸前俾人加咗一剔扮Nike，好搞笑！
4.內櫳以舊屋改建，加上籌集而來的舊物，風格一致，一切配合得天衣無縫。
5.唔好誤會，呢個唔係垃圾桶，係韓國已停用多年的郵筒，店主廢物利用，做裝飾。
6.餐廳一角，看鏡看櫈就知是昔日髮廊，因為與我們的上海理髮店有幾分相似呢。
7.木製廁所左男右女，看似簡陋，其實內裏藏有現代抽水馬桶，出面重有得洗手，放心。
8.刨冰車，車身上大大隻「冰」字重好搶眼，一見即令人幻想有個伯伯在街頭推着它。

老闆天生儲物狂

其實「老竇小時候」已經有6年歷史，由於老闆本身係一個好鍾意儲舊嘢的人，玩的睇的用的聽的立立雜雜都會視為珍品，日積月累愈儲愈多，開始為儲存空間煩惱。某日靈機一觸，諗起不如開間主題餐廳，一次過將全部舊嘢Show晒出嚟，可以同人分享之餘又夠Gimmick，如此一間擁有好貼切名字的「老竇小時候」就誕生喇。
其實唔只室內裝修勁懷舊，單係店門已經夠晒特色，門口對出居然係條火車軌，加埋座椅、喇叭、木柱，唔知重以為係真正火車站㖭！

■餐廳位置有點隱蔽，但門口有成大條火車軌，斷估實搵到！

客人送贈展品

餐廳大部份「展品」都係老闆多年珍藏，小部份則由顧客慷慨解囊捐出。負責人話年輕客人嚟到會覺得環境布置好新鮮，多數玩吓留言影吓相留念食完嘢就走，但上年紀的老一輩見餐廳的每一物，則會重拾童年感覺，產生莫名親切感，所以熟客會經常主動提出將自己的舊文具、畫報、火柴盒、鐵飯盒等等舊物送出，變成餐廳裝修的一部份，得閒就返嚟食嘢，望吓、懷舊吓。