今年頭炮熱賣新盤堅尼地城泓都，賣樓手法為人詬病。
讀者黃先生投訴話，個盤市區重建局都有份，話晒都係同政府有關嘅機構，點解內購場面搞到咁黑暗，場面混亂，價單又冇，又要一圈圈咁賣，擺明畀啲員工搵着數，當中重可能牽涉到，該局職員經內購後炒賣之嫌，令真正想買樓嘅市民反而買唔到，又或者被迫買貴樓，亦即係變相輸送利益。
佢質疑，點解唔可以用公開發售方式去做呢？市建局未來重有好多個呢類重建項目要賣，如果次次搞成咁，真係唔係好掂。
市建局發言人就回應話，該局並唔係賣樓專家，所以賣樓策略，都交畀私人發展商去做。該局內部有既定政策，唔容許員工以內購方式，買該局有份發展嘅重建項目，包括泓都在內。
另外，所有員工或其直系親屬，如果喺該局已公布嘅重建區內買樓，都要向該局申報。
中原地產精英會，較早前為青年企業家發展局商校夥伴計劃，搞睇樓活動，原意係畀中學生認識營商環境，計劃未來事業，結果竟然激發起學生，決心賺錢買豪宅。
中原精英會員工，日前帶同福建中學師生，參觀荃灣爵悅庭、馬灣珀麗灣及中半山富滙豪庭。
一眾學生參觀過後，對豪宅富滙豪庭印象最深刻，睇見個工人房，大過自己屋企個廳，紛紛立志要成為豪宅主人。
青年企業家發展局主席梁劉柔芬勉勵學生話，香港係個可以創造奇迹嘅地方，只要有創意，就有機會成功。
地產界topsales，多數以佣金收入衡量，其次就係開單數量多寡。
中原地產○四年全年，開單超過八十張嘅代理，就可以晉身為精英會會員，隸屬屯門市廣場分行嘅陳劍霞，去年開單超過一百二十張，平均每三日，就促成一單生意，堪稱「開單王」。
佢嘅成功之道，除咗老生常談夠勤力之外，原來耐性都好重要。
陳劍霞試過有個客，要搵月租三千零蚊嘅超平租盤，擾攘一輪，終於幫佢搵到，個客好滿意，重照行規，畀足二千五百蚊佣，之後更加為佢帶來另外五單生意。
恒基、新世界與新地合作嘅馬鞍山落禾沙大型住宅項目，差唔多百四萬呎，其中三成幾屬於政府地。
恒基最近向城規會入發展總綱藍圖，申請將所有學校擺喺政府地皮上面。城規會即刻覺得好唔妥，一來起學校嘅地方，唔可以計地積比，二來呢啲政府地，又唔係恒基擁有，咁樣做，即係剝奪政府地皮其他發展潛力。再者，現行規劃綱領，亦唔容許咁做，所以，就算恒基今次計劃，冇超出分區圖內所訂限制，城規會都唔可以畀佢過。
項目會起二十三幢十二至三十四層高住宅，共有三千六百伙。
另外，新地西貢十四鄉項目，因為冇交生態評估報告，而俾城規會拒批。
香港人做嘢，一向講求效率，買賣舖位，更加係爭分奪秒，好似英皇集團主席楊受成咁，睇舖五分鐘，就可以扑槌，以八千七百萬，買入旺角街舖。
個舖喺西洋菜街昌記大廈地下D，一千呎，由連鎖店3-Concept，以每月二十五萬租用至明年。聽講，楊受成之所以咁決斷，皆因個舖貼住百老匯戲院，加上位處行人專區，前景無限，所以呎價去到八萬七，亦都唔覺得貴。
去年底，喜來登集團有關人士，以七千七百萬，買入呢個舖，短短一個月，就勁賺一千萬，羨慕死人！
商場拆售潮持續，最新係旺角朗豪坊附近旺角站，即係資深投資者黃海明持有嘅南華戲院舊址，一樓呎價兩萬八，二樓兩萬，近二百個細舖，已經賣出四五十個，買家獲頭兩年八厘租金回報。
專門做舖嘅華滙老闆陳國雄話，近年唔少買開住宅嘅小投資者，轉買拆售商場，貪銀碼細回報高。不過，以往曾經有商場拆售之後，散業主各自為政，租務欠缺統籌，租戶組合難以控制，影響日後租值同埋價值。
佢話，商場拆售成唔成功，唔單止睇即時銷路，日後租務同租值更加緊要。
電郵地址：
