昨日熱門話題係趙紫陽過身，但事件對本地股市冇影響，恒指照升可也，但成交縮到只有唔夠150億銀，市況實情相當悶，就算近期大上大落的澳門賭業股，亦只係個別發展，動力明顯大減。
經紀黃話，如果小初喜歡澳門概念股，但又唔想太波動，永亨銀行（302）係一個唔錯的選擇，因為永亨近年來在濠江大力發展，雖然在當地錄得的貸款金額唔算好勁，但當地的生意卻提供唔少盈利，所以永亨可算濠江概念十足。此外，早前收購浙江第一銀行後，兩者合併的協同效應，有望好快顯現。
小初亦知近年有個美資基金一直密密收集永亨，似乎係長線睇好，所以經紀黃推介買永亨，並唔係冇道理。永亨昨日升1%，收51.25元，成交股數42萬股，金額2160萬元。
另外，潮流時興炒作水務股，繼粵海投資（270）、上實（363）同埋天津創業環保（1065）等公司因為發展水務被炒高後，市場傳聞有投資水務的國中控股（202）亦蠢蠢欲動，昨日升6.69%，收0.255元。
慕容小初