英名人講嘢邊個最好聽？
辛伯靚聲王碧咸鴨仔叫

英國廣播公司BBC最近搞咗個民意調查，要求公眾選出最鍾意嘅靚聲名人，結果老牌占士邦辛康納利（SeanConnery）嘅一把低沉而雄渾嘅聲線，最得英國人喜愛，成為今次調查嘅冠軍，其實辛伯嘅蘇格蘭口音成日俾人話好難聽，不過可能就係因為佢成日咿咿嗡嗡唔知講乜，所以特別性感。　　

英國口音夠純正
除咗七十四歲嘅辛伯之外，一向深受英國人愛戴嘅男星曉格蘭特（HughGrant）亦榜上有名，佢把聲溫柔得嚟又有啲懶洋洋嘅感覺，再加上佢純正嘅英國口音，真係迷死好多女士，難怪佢雖然已經四十四歲，但仍然係好多人嘅夢中情人。其餘入圍至愛靚聲嘅名人重有著名主持人TerryWogan同新聞報道員TrevorMcDonald。

唔得民心犯眾憎
至於英國人至唔鍾意聽嘅聲線，就有成日俾人抗議嘅英國首相貝理雅（TonyBlair），講真貝理雅把聲都算幾洪亮同好聽，不過可惜佢講嘅嘢唔得民心，成為犯眾憎，所以啲人淨係聽到佢把聲都走夾唔唞，而往日係英國萬人迷嘅碧咸（DavidBeckham）今次亦不幸上榜，冇法啦，碧咸哥把聲又真係幾細路同難頂，成把鴨仔聲，以前佢受歡迎，啲fans就梗係鍾意埋佢把聲啦，如今佢人氣大不如前，啲人就連佢把聲都嫌棄埋。