成個英國都瀰漫住雲格同費格遜嘅口水花之際，榜首嘅車路士領隊摩連奴就冇你咁好氣，啱啱喺周日坐老闆阿巴莫域治嘅私人飛機一齊到魯營球場，咩風吹佢哋嚟？心情靚極嘅阿巴莫域治就想睇吓佢個「夢中情人」細哨fit唔fit；坐佢附近嘅摩連奴就冇咁疏乎啦！見佢碌大對眼睇之餘，重搏命做筆記，巴塞球員傳一腳波，佢就喺張紙度畫一下。
摩連奴絕對唔係喺老細面前扮嘢啊，而係為咗下月底對巴塞嘅歐聯十六強戰作準備。摩連奴賽後重牙擦擦話，自己隊波有五十一個巴仙將巴塞淘汰出局！有咁認真嘅領隊，唔怪得知車路士今屆咁掂啦！好心雲格同費格遜就嘈少兩句啦！
印尼一名七歲嘅海嘯幸存者，災難過後居然得福，佢漂流十九日後獲救當日，着住件印有葡萄牙國家隊標誌嘅盜版波衫，經葡國電視台報道佢點慘後喚起全國嘅同情心；國家隊教練史高拉利更以球隊名義，買咗一塊地同一間屋畀佢，重話願意請佢免費睇一場國家隊嘅比賽㖭。
○四年歐洲國家盃決賽周英格蘭八強對葡萄牙鬥至互射十二碼一役，成為英格蘭國內去年最高收視電視節目，有近二千一百萬人收看；而第二位就係分組賽對法國，都有一千七百多萬人，連英女皇最喜歡睇、連續播咗四十幾年嘅《加冕街》（CoronationStreet）都要行埋一邊。
榜尾西布朗日前作客臨完前俾戴奧比頂入，輸畀富咸，領隊白賴仁笠臣自然唔多高興，話晒場波形勢唔差；連富咸領隊高文都話有運。笠臣話比賽末段已經叫班球員控球在腳，攞一分都得，偏偏臨天光先輸。西布朗今季唔止一次完場前先輸或俾對手迫和，咁落去怕且護級無望。
迪肯尼奧回歸拉素後一直係風頭躉，據講佢本五年前出版嘅自傳，近日喺羅馬掀起搶購熱，有間書店老闆話聖誕前入嗰五十本，一早賣清光。出版商打算趕快加印，有口痕嘅拉素球迷講笑話本自傳咁快斷市，可能係俾托迪掃晒，等無人買到，迪肯尼奧風頭蓋唔過自己喎。