中共前總書記趙紫陽終於正式獲得永久自由，享年八十五歲，經過六四大浩劫，炒魷兼孭鑊，並遭到軟禁長達十六年，老趙硬淨過人，咁都捱到今日先至肯放手，可見共產黨徒，真係由特殊材料所造成，唔講得笑囉！
趙紫陽係乜水，香港染金毛一族青少年，睇怕一無記憶，二冇興趣。趙紫陽拜拜，亦唔同哥哥、霑叔、羅文等人去世，香港人唔係咁感情衝動，不過總之知道呢個阿伯當年抗命，唔肯聽矮仔嗰支笛，拒絕向學生平民派坦克開炮開槍，寧願劈炮唔撈，喺共產黨集團之中，呢條友係罕有似番個人嘅高等動物，同埋始終係忠嘅囉！
不但係咁，當老趙遭到軟禁，被勒令審查檢討，佢重好有自我，拒絕「查找不足」，死不認錯，言下之意，即是話錯嘅係下令鎮壓人民嘅屠夫兇手，嘩，呢份吉屎，喺全球華人社會，真係好稀有啫！
呢份仁愛心腸，亦感動咗少數人！唔怪得溫寶冇幾耐之前，走去探訪死難礦工孤兒，攬實個細蚊仔，含住泡眼淚，學足趙紫陽當年嘅台詞及聲調語氣，好似上咗身咁話：「我來晚了」（香港語繙譯：即是我又遲到嘞咁解）！原來，溫寶係向海外發出達文西密碼！現在諗番，香港人真係蠢，咁都收唔到！𠵱家終於收到嘞，並想向溫寶致以深切慰問：你冇嘢吖嘛？好聲執生呀，多多保重呀！
老趙係國際協議中英聯合聲明簽署人，佢拜拜咗，廢董竟然全無一字隻語哀悼！冇錯，你係要睇清壽爺眉頭眼額面色口令，先至決定條尾搖唔搖，定係搖幾多下，之不過阿趙係收回香港主權嘅畫龜關鍵人物，廢董可唔可以實踐吓「高度自治」一次咁多，代表港人向阿趙講一聲goodbye呢？定係怕搖錯尾，吠錯聲，會遭到壽爺籐條炆豬肉嘅懲罰呢？若果咁樣壽爺都話要炒你魷，咁廢董幾十億身家，使唔使cheap到咁呢？
定係老趙當年自己犯咗少少口孽，故此佢連咁嘅福報都冇呢？乜嘢口孽呀？就係當年香港記者驚悉中國收回香港，話畀阿趙知：「香港人很擔心！」點知阿趙鼻孔朝天，反質一句：「有甚麼好擔心呢？」有甚麼好擔心？不如問吓阿董今日連悼詞都唔敢噏一個字，佢究竟擔心啲乜囉？老趙同老董，大家都係肉在砧板上，不過阿董大膽啲，佢話佢會撐到○七喎！阿董，你好嘢！
傳真︰2623-9278
電郵︰