恒指在100日線（13518）水平獲得支持，已連續5天，噚日終於出現較大幅度反彈，恒指以接近全日高位收市，報13621，升126點，但成交就縮到只得149億元。
大市反彈，暫時仍未能升越10日線（13639），加上20日線（13923）又跌穿50日線（13931），確認大市中期調整，跌勢持續，雖則短期因急挫而出現技術反彈，但向上真係阻力重重，極其量升多百多二百點就會掉頭，再度尋底。
短期後市雖然睇淡（中線睇得好好），但炒股唔炒市，好似噚日國企又有番生氣，原料股表現最突出，早日推介嘅鞍鋼（347），最高4.275元，收4.225元，升4.3%，中國鋁業（2600）有大行唱好，話目標價6元，股價就大幅由低位回升，高收4.30元，升5.5%，成交更大增到5300萬股，中鋁反彈，已重上10日線（4.157元）之上，唔排除會補回月初4.50元至4.325元的下跌裂口。
澳門概念股大多在回氣，惟獨結好控股（064）最強勢，惹人好感，最高曾上到2.925元，收2.775元，升0.2元，升幅7.7%，成交亦好活躍，有人賺夠，亦有人上車，有消息話整固完成後，過年前會有好戲上演。噚日高踞升榜首位嘅139集團（139），收4.4仙，大升33.3%，消息亦係同傾緊澳門酒店及娛樂事業有關，事實上，139集團揸住2億多元現金（包括可變現的證券投資），趁現時澳門熱，進軍濠江亦係理所當然。
中資線呢輪活動少咗，噚日傾開，佢哋話過年前後，國企應該會玩番轉；至於其他股票，就話隻蜂林（8156）要昅實，中資好快會做工夫，初步係去番舊年11月的1元水平。
蜂林近排由低位0.64元反彈，升上0.83元，升穿晒10日線（0.714元）同20日線（0.751元），但就受制50日線（0.793元），暫時形成旗形，由於MACD已出現入貨訊號，中期升浪開展，好大機會破位而上，照度上去，上升目標剛好係1元。
蜂林有業績支持，初步估計05年度（6月年結）可獲利7000萬元，每股盈利14.5仙，加上預期分拆阿波羅百貨上市，又會帶來刺激，以PE8倍計，股價已可見1.16元。
郭兆誠