一月十三日本欄講《英基有人護航》，尊貴的議員有兩個仔在英基學校就讀，晨早就打電話嚟搵左丁山算帳，話左丁山有啲嘢寫錯咗喎。尊貴的議員話：「英基冇一年用十億咁多，四年加埋就攞咗政府十億元。英基學校以前冇錯係英國人子弟、英軍子女攻讀嘅學校，但係現在七成學生都係本港中產階級，好多係回流移民子女，因在外國長大，中文唔掂，讀國際學校太貴，所以讀英基學校啫。我𠵱家都好杰㗎，英基小學每月學費五千、中學學費七千，但如果讀淺水灣國際學校、德瑞（GermanSwiss），學費重貴，過萬銀一個月；讀葉國華先生嘅學校，更杰，每月學費一萬二千蚊。
喂，英基學校學費平過國際學校，學業成績一啲都唔失禮，算係高級中產階級（UpperMiddleClass）嘅教育救星，你都唔想踩死佢吖嘛？呢個階級嘅人交稅交到十足十，全部繳交標準稅（百分之十五），交稅有份，福利就輪唔到，有仔女讀英基學校，算係攞番啲咁多回報，咁你都唔抵得！申請入讀英基學校嘅等候名單有一萬多人，唔知幾時先至輪得到，所以英基學校每班有近三十人，直情係大班教學，唔同HKIS，每班有十一、十二人。你話英基啲先生人工貴，你知唔知英鎊升咗幾多？唔少津貼中小學嘅外籍英語老師辭職唔做，就因為以英鎊計算，佢哋減晒薪。以現在嘅薪水，去英國請老師嚟香港教，好難請到合資格嘅人㗎！」
尊貴的議員一輪嘴，有佢講，冇我講，於是有聞必錄。香港講親教育問題，由幼稚園至大學，由私校至國際學校，人人有氣，個個有苦水，無處發洩，就一於鬧阿瑟王，好彩阿瑟王夠高大夠肥，夠晒硬淨，搵第二個做教統局局長，都會被壓扁。