星級名車：<br>譚小環外表斯文靠揸大車蝦蝦霸霸

星級名車：
譚小環外表斯文靠揸大車蝦蝦霸霸

咪見譚小環外表細粒又斯文，其實最愛揸大車「恰」人，自從考獲車牌後，愛驅愈揸愈大，因為貪其大大架易Cut線，就算唔睇得都嚇得，可以話愈揸愈心雄。面對眼前贏盡男人歡心的意大利愛快羅密歐GT，小環一見便愛上，還頻讚架車有型又有力，令她又動換畫之心。

記者：曾順珍　攝影：周旭文

舒服又好力

譚小環好喜歡車，特別是跑車或大車，她話寧可買少件衫都要間中換新車獎勵自己，不知是否又到換車期限，她對這架AlfaRomeoGT2.0非常有興趣，不但大讚它有型又靚仔，重話揸上手感覺舒服，動力源源不絕；加上桶形皮座的駕駛席，安坐其中有被包裹合攏的感覺。
「呢架Alfa唔錯，揸上手好有力，行車又定，尤其是彎位好好劈，加上避震好，油門和迫力反應快又到位；我就最鍾意個車頭，唔怪得好多朋友都買咗Alfa，全部都用靚料做，所以要幾十萬一架總有理由。」讚完一輪後她果然立即向車行職員索卡片和問價，看來甚有興趣。

■小環覺得自己的駕駛技術唔差，只是方向感較弱。

邊訪問邊考牌

考牌至今雖有十年，但小環還記得當年考車的情況。
「我考牌嘅其中原因，係因為我當選港姐冠軍後，其中一個獎品就係架本田Accord，所以我要考個車牌先可以揸車。嗰次考牌時，因為個考牌官認得我，所以佢就一路考一路同我傾偈，問我入娛樂圈慣唔慣，又問我攞香港小姐冠軍嘅心情；我只知當時好緊張，一面顧住路面情況，一面又要答佢問題，簡直係一路接受訪問一路考。」最後呢個咁乖答問題的考生，當然係一Take過OK。
揸完一輪Accord後，小環開始對自己的駕駛技術有信心，於是便轉揸大馬力的四驅車，豐田Rav4、Prado，三菱PajeroEvolution等統統玩過。

大件有着數

「揸大車有好多着數㗎！最明顯係Cut線特別容易，尤其係揸PajeroEvolution，每當我想Cut線時，我都會踩油加速同打燈，你知Evolution個樣已經好夠惡，再加上Engine嘅"HomHom"聲，就連的士同小巴司機都俾我兇到，立即讓我過線，雖然我都算蝦蝦霸霸，但就好有滿足感！不過荷包就好傷，因為油錢用得特別多，一個月都要成七、八千蚊。」
這個最愛以大欺小的前港姐，為令父母上落方便，最終忍痛放棄霸王四驅車而改以寶馬和平治等轎車代步。
「𠵱家我比較鍾意歐洲車，因為鋼料好堅，有實在感，唔似日本車咁輕浮。最鍾意係大車，最唔鍾意係車身好細嘅車。」當然啦，大車唔睇得都嚇得吖嘛！

舒適座椅

■雖然是三門跑車，但後座空間尚算闊落，可以坐得落三個成年人。

■前座為桶形跑椅，令駕駛者坐得更穩陣。

■門壁都配上跟座椅相同的紅色，令車廂更感熱辣辣。

■尾廂空間闊大，可存放大型行李。

獨特車頭

■好多人話Alfa車頭有型，最少鬼面罩個款真係好獨特。

■圓渾的車尾配合車身線條，型格中帶點優美。

■合金胎軨充滿動感，最有型還是中間個彩色標誌。

■一見到架AlfaGT，小環已經愛不釋手，還有意考慮換新車。

跑格裝備

銀白底紅字儀表甚具跑味，而且位置擺放清晰易見。

■三幅式真皮功能跑車軚環，Sport味極濃。

■軚環背後置有加減波按鈕，方便轉檔之用。

■2.0引擎配上5前速Selespeed加減半自動波，增加駕駛樂趣。

■中控台配上銀色面板，頗具時尚味道。

AlfaRomeoGT2.0Specification

引擎：1970cc直4DOHC
馬力：165ps/6,400rpm
扭力：21.0kgm/3250rpm
傳動：5前速Selespeed半自動波
懸掛：（前）雙搖臂（後）麥花臣支柱
制動：（前）透氣碟（後）碟式(ABS)
輪胎：215/45ZR17GoodyearEagleF1
尺碼：4489×1763×1362mm
軸距：2596mm；車重：1320kg
0-100公里：8.7秒；極速：216km/h
車輛提供：嘉輪汽車（28778788）

■流線型車身設計，令高速行車時可減低風阻。