特首董建華唔想上電視電台烽煙節目面對大眾，噚日出席商界午餐會推銷施政報告，可能諗住好安全，因為大家話晒都係出身商界，點都會畀番幾分薄面。點知到台下發言環節，有位本地英文報章代表發問，阿董一聽到人哋嚟自報家門，就好意外，脫口而出咁話，以為在座每一位都係專業嘅生意人㖭。
點知到咗下一條問題，又係一位傳媒代表，佢問問題前就講到明，話自己係《亞洲華爾街日報》代表，雖然係傳媒，但都係大公司，夠晒資格問問題。你話阿董咁俾人暗寸，幾無癮呢！
阿董噚日好忙，去完午餐會，又去香港‧浙江周開幕禮，同場重有馮國經、查史美倫、葉澍堃、柯清輝、范鴻齡等畀面。講到交際應酬滿場飛阿董就叻，不過被記者問到對趙紫陽去世有冇悼文或回應，阿董噚日成日都唔回應，咁又係，阿爺都未出聲，阿董點敢出頭。
（圖）董建華（左）出席香港‧浙江周嘅開幕禮，重同馮國經握手，中為浙江省委書記習近平。
傳真︰2623-9278
電郵︰