個市有番啲陽光，恒指好咗126點。國指更加生猛，升76點，升幅1.7%，大過恒指0.94%嘅升幅。
中企C輪3776：大市總成交149.5億元，國指成份股成交23.42億元，佔總成交15.7%。上周五，國指成份股成24.14億元，只係佔大市總成交12%。國指成份股成交所佔比率上升，睇嚟，炒股資金選咗國企股做搵銀對象，對於國內A股B股昨日散散哋完全唔理。昨日升幅超過5%嘅國企股有3隻，佢哋係中海發展（1138）、海螺（914）、中鋁（2600）。
中企指數C輪，搵隻嚟短炒，對象係3776，9月尾到期，輪價19.3仙，溢價7.8%，槓桿率9.6倍（有效5.3倍），引伸波幅31.8%。隻輪交投好勁，銀碼超過66球，萬一睇錯市，都唔怕無法止蝕甩身。
國壽C輪4681：國壽（2628）收5.30元，升0.10元。周大福減持國壽股份消息，已經消化晒。國指造好，重磅股通常都有份，趁國壽未升得夠前，執少少C輪發吓新年財。
國壽C輪正路對象係4681，7月初到期，輪價51仙，溢價7.7%，槓桿率10.4倍（有效5.9倍），引伸波幅33.2%。冇錯，4681爆炸力稍嫌不足，想搏殺，則揀4524，當然要畀高啲溢價，而萬一估錯咗正股方向，揸4524要輸多好多。
新地C輪4643：大隻地產股最威係新地（016），收72元，升1.5元。C輪2276，大升38%。揀正路對象，要4643，6月初到期，輪價53仙，溢價4.6%，槓桿率13.6倍（有效8倍），引伸波幅26.2%。
章盛