潮流興戴腕帶,唔少英超球員都有呢個習慣,而阿仙奴球星亨利最近就戴黑白色腕帶,支持由體育用品公司發起嘅反種族歧視行動。亨利試過被人家種族歧視,由呢位受害人親身宣傳夠晒說服力。條黑白色腕帶正大量生產,將會喺今個月底公開發售,話唔定會成為潮流標記。
英超球星好似李奧費迪南、林柏特、謝拉特同埋朗尼都有戴腕帶,上面都刻有唔同口號。相信球迷都記得,舊年西班牙國家隊教練阿拉干尼斯話過亨利係「黑鬼」,惹起好大風波。就反種族歧視一事,亨利話明白自己喺球場能夠做嘅嘢唔多,而戴嘅腕帶係黑白色(寓意係種族融和),反種族歧視味道夠晒重,應該有唔錯嘅號召力。
羅馬里奧同比利加埋都快一百歲啦,重喺度嗌交。比利先前叫羅馬里奧喺高峯期就應該退休;啱啱想復出嘅後者一聽,當堂把幾火,重話對方講親都係廢話,最好用襪塞住自己把口。羅馬里奧嘅言論引起巴西人不滿,後來佢死死氣道歉,球王亦大人有大量原諒佢。
照計古迪仙尼唔係犯太歲吖,又會咁黑仔嘅?佢今季不但冇正選打,屋企人重被劏死牛㖭。話說日前,佢未婚妻同埋老竇同個仔(老竇係S恩沙基)喺意大利遊車河遇山賊,老竇嘅金勞同銀包被搶外,重被打傷;佢貌美如花嘅未婚妻更差啲被非禮,幸好佢大叫唔好,嚇走賊人。
曼城主將胡禮菲臘斯前日對水晶宮時,只係用十二分鐘就先開紀錄,原來佢進行性事嘅速度更快,得五至十分鐘。話說有個36E身材嘅脫衣舞孃,向英國報章大爆胡禮菲臘斯嘅「速度」,又彈對方球場上踢嘅係英超聯組別,但床上技術就係丁組水平喎。胡禮菲臘斯就暫未回應。
列文早前炮轟雲格將佢打入冷宮,前晚阿仙奴輸波,雲格維護艾蒙尼亞所失一球唔關佢事。不過,我求大俠都戥列文唔抵,起碼列文應付高波唔會經常判斷錯誤。𠵱家阿仙奴、曼聯、利物浦個門將唔掂,車路士門神施亞就六場唔失波,怕且今年聯賽冠軍,就係睇邊隊有個好龍門。
逢周一至周五見報