特首自認不足，講到重視社會和諧，家和萬事興，殊不知施政報告之前，特區政府已實行分化傳媒，製造分裂，搞到口不停，新聞處處長甚為尷尬。
事緣政府為求造勢，上星期一（一月十日）唔知係邊位師爺出主意，只邀請五家媒體，據大記者講，就係文匯、經濟、明報、ＴＶＢ、ＡＴＶ到政府總部閂埋門聽劉兆佳講施政報告，話明係背景簡報，要到星期三（一月十二日）施政報告出籠後，先可以報道。如果大家守規矩，唔出聲嘅話，其他媒體就唔會知啦，點知Ａ記ＴＶ一時心急，當晚六點就在新聞報告度猛咁講，報紙編輯一睇到，成個彈起，立即就一五一十寫晒出嚟，星期二見報；其他冇份參加背景簡報嘅傳媒，有得抄就抄咯，於是星期三早上，施政報告嘅要點全部曝光。
星期三施政報告之後，特首與佳叔向傳媒老總解畫。講完之後，特首一行開，大姐美就發炮，指政府分明大細超，搵傳媒聽吹風，有偏心之嫌，佳叔急急腳又走咗，新聞處長走唔切，俾啲老總包圍，難以脫身。大姐美直言政府唔公道，政府電台猛咁呼冤，話份屬政府媒體，點解冇份參加吹風會？財經台最受政府輕視，老總自然加埋一把口去呻。有線電視二十四小時播新聞，影響力極大，政府居然當佢冇到，大哥趙當然冇晒癮；大公報素來忠貞，原來捧場就預佢，放料就冇行。至於蘋果嘛，從來都係反派，叩多九十個頭都唔會有份㗎啦！
特首講共建和諧社會，佢嘅手下就刻意營造傳媒分裂吵鬧，都唔知係邊個嘅錯。正如一啲綜援戶收咗綜援，唔肯交租，激壞房屋署，要求社會福利署派錢之前，先扣除公屋租金畀房署，但社署一於唔聽，我行我素，你話邊個部門啱呢？特首點樣去管？