最近堅尼地城泓都開售，負責賣樓嘅新世界何伍燕榆，都要馬不停蹄，又要顧住賣樓，又要幫手做宣傳，就連噚日星期日，何太都有去出席宣傳活動。
不過，做嘢都一樣可以享家庭樂，因為噚日泓都搞嘅童裝時裝表演，特別請到何太未夠三歲嘅孫女Jacqueline，客串做模特兒，可以一邊做嘢，一邊湊孫。
Jacqueline負責示範一件橙色嘅大褸，重同埋佢個朋友仔Rachael一齊出場。
噚日重有一班小朋友，示範一個日本品牌嘅童裝，重分咗便服、運動裝、牛仔裝等等，示範唔同款式嘅服裝，喺一眾小模特兒當中，重有唔同國籍嘅小朋友。
除咗童裝秀，重有少年版拉丁舞表演，負責嘅其中一位嘉賓，原來係中原助理營業董事周永輝嘅寶貝女，之前重喺公開賽得過獎。地產界人士嘅下一代，真係多才多藝。
舊年樓市興旺，係不爭嘅事實，再加上自由行，商舖市況，幾乎旺過九七年，同時亦特別多商場拆售。
好似旺角動感銀城地庫，首輪內購，三十幾個舖位，貶吓眼賣清。大業主近排加推最後三十個舖位，買家可以連同六厘回報租約一併購入，滙豐銀行提供最高七成按揭。
另外，舊年十月賣得非常好嘅葵涌廣場時尚坊，據美聯黃子華透露，七十二個舖位中，只有小部份由買家自用，其餘放租舖位，已經租出超過八成，呎租由八十至一百二十，回報率有六厘半，頗為理想。
慈善機構「善寧會」，每年都會主辦一次行山籌款活動，今年就喺噚日舉辦咗，以「登山善行，紓己寧人」為口號，喺大欖郊野公園大棠站起步，有兩種路程，分別為十二及十六公里，最少三至四個鐘先行得完。
呢個活動特別多地產界贊助，所以噚日出現地產界知名人士，例如新地蘇仲強同埋恒基張炳強，重有一大班地產代理，甚至各大傳媒財經地產版同行等等。
呢個活動，知名度可能唔及電視台大搞嘅籌款晚會，但係籌款能力都唔小，自九二年起，已經累積籌得超過二千萬。
猴年樓市勁升，好多人賺錢賺到哈哈笑，即使舊年初先入市嘅買家，到年底轉售，獲利依然豐厚。至於一手轉售最多嘅新盤，根據美聯物業統計，原來係土瓜灣傲雲峰，全年有二百五十宗，幾乎係第二位元朗YOHOTown一百三十六宗嘅兩倍。
舊年一手轉售個案，總共有一千七百二十六宗，九成半以上獲利。當中近半數，即約莫八百三十七宗，喺第四季轉售。至於獲利幅度最大嘅，就係長沙灣宇晴軒三座低層G室，二月買入，十一月賣出，勁賺五成六，帳面數接近一百萬。
電郵地址：
