一月以來，港股扁吓扁吓，恒指總共散咗735點，不過上禮拜只係佔跌幅80點，跌勢轉緩。對港股有少少指導作用嘅美股，冇咁唔掂，杜指年初至今唔見225點，上禮拜只佔46點。港股短期超賣，有機會技術性反彈些少，當然唔可以期望太高。
恒指C輪4478：博港股反彈，買恒指C輪，短期嘅揀4478，3月尾夠鐘，輪價9.3仙，溢價2.3%，槓桿率33.7倍（有效17.6倍），引伸波幅16.1%。屆滿日相差唔大嘅有4548，但數據冇4478咁靚。
恒指C輪想揀遠期少少，則向3577埋手。隻輪5月尾夠鐘，輪價9.8仙，溢價3.7%，槓桿率22.6倍（有效11.6倍），引伸波幅18.9%。
恒地C輪3681：恒地（012）月初至今跌4元，跌幅達11%，上禮拜跌1元，期內跑輸大市。上周收36.40元，已經接近5個月以來最低位（35.70元）。呢幾個月樓市冇出問題，估計恒地可守35.70元低位，有力反彈。
買恒地C輪博跟正股浮番上去，揀3681，6月中夠鐘，輪價22仙，溢價8.6%，槓桿率16.5倍（有效7.8倍），引伸波幅29.0%。恒地C輪一般溢價唔低，交投疏落，3681算係最靚。
利豐C輪2284：利豐（494）04年跑輸大市，1月初至今亦跑唔贏，年初至今散0.95元，上禮拜佔0.30元，收12.15元，估計喺11.70/11.80元會搵到支持，到時買啲C輪博反彈，對象係2284，9月尾到期，輪價24.7仙，溢價2.6%，槓桿率4.9倍（有效3.8倍），引伸波幅34.6%。
章盛