日韓興啲乜：<br>漢城高達迷總基地同五呎高渣古影相

日韓興啲乜：
漢城高達迷總基地同五呎高渣古影相

無錯，韓風憑裴勇俊成功入侵到日本市場，但東洋風多年來不斷吹動這支太極旗，早已無孔不入滲透韓人各方面生活，玩具、動畫就是好例子，日本數一數二的玩具商Bandai，就藉高達進軍韓國，於漢城龍山開設全國唯一的高達專門店「THEGUNDAMBASE.SIDE1」，場內除展品和遊戲機外，還有香港都未見過的高達Cafe，高達迷在這個基地一定樂而忘返。

記者：張銘恩　攝影：陳陶鈞
鳴謝：韓國觀光公社（www.tour2korea.com）

基地佔地3000呎

「THEGUNDAMBASE.SIDE1」位處龍山電子購物城ETLAND，ETLAND有點像香港的先達，售賣各式各樣的電子產品，另有戲院及食肆，而高達專門店就位於五樓，佔地超過3,000呎，於03年兒童節開幕，內有展覽部、遊戲機區、玩具售賣部及Cafe，店員十分友善親切，識韓語絕對可以同佢哋大談高達經。

■鎮店之寶，人咁高的渣古，影相熱點。

■專門店離地鐵站15分鐘，好彩外圍掛起大大幅高達海報，發雞盲都唔會Miss。

展覽品目不暇給

專門店最令人注目的當然係無數高達展品，尤其對首次參觀的高達迷嚟講，每個旮旯所產生的磁場都會令人腎上腺素激增。四周展品既多亦精，重要係唔知點解地方細細，睇完半粒鐘回到起點，但仍然會重新發現之前自己Miss咗嘅新嘢靚嘢！透明櫃擺放最有觀賞價值的高達模型，引得唔少男士駐足觀看，牆上掛滿高達原型製作圖、草稿，又一必到影相位，不過講到最啱港人Feel，一定非一幅「FightinHongKong」圖畫莫屬，圖畫背景居然係維多利亞港。

■玻璃櫃排列整齊，這個GundamStrike超多關節，可穩陣地擺出各類靚仔Pose。

■「FightinHongKong」圖畫，留意，背景係維多利亞港！

■渣古單車，睇吓好喇，因為要成5千幾港紙，重貴過喺香港買。

■Q版高達組成足球隊，放喺我屋企就開心咯。

■隨便一角都有驚喜，好似呢個立體掛牆鐘，用機械人頭代替數字。

同韓仔一齊打躉

睇完咁多展品心癮大起，佔有慾大增，手痕友可以去玩具售賣部睇睇有乜心水手信，除高達模型外，其他Bandai玩具一樣有得賣；掃完貨意猶未盡？重可以去試玩區免費試玩最新高達遊戲，試玩區勁受年輕人歡迎，好多韓仔齋睇人玩都已經好興奮。唔買唔玩可以任睇最新動畫，同其他韓仔一齊打躉，喪蒲幾粒鐘。

■試玩區人頭湧湧，圍住喪玩企足幾粒鐘。

■Figure展櫃上的電視機，全日不停播放高達動畫。

■GundamW黑白印花短袖Tee，$134。

食物以角色命名

個人認為最有噱頭是「GUNDAMBAR&CAFE」！場地分兩部份，一邊係Bar一邊係Cafe，環境布置以高達故事及角色為題，Bar枱背後的酒架上放滿模型，牆上掛了渣古結他，連餐牌上的食物都會以劇集內的角色命名！好好笑！同場亦有不少漫畫及Game書，坐低飲杯嘢可以傾吓高達經或刨吓書，環境都幾自在。

■GUNDAMBAR，牆上兩把渣古結他，好型仔！

■有需要㩒吧枱上呢粒掣，服務員即到，果然係機動世界！

■卡碧尼香腸，味道一般勝在飽肚咁喇，$15。

■DeepStriker即磨加榛子咖啡，隻杯贏晒，$26。

■Halo就係日本綠茶，幾清香，$15。

高達迷幾句

Cindy
其實我只係陪男朋友一齊嚟，好彩有間Cafe俾我坐吓等佢。

車先生
我好鍾意高達，基地咁多模型睇，勁正。

Angela
我覺得專門店好有型，尤其門口個大渣古。

THEGUNDAMBASE.SIDE1

地址：漢城龍山區漢江路3街16-9「ETLAND」5樓
電話：（82）2-701-7270
營業時間：10:00am至8:00pm
網址：www.gundambase.com
交通：乘地鐵1號線到龍山站落車，跟指示步行15分鐘直達。
註：以上價錢為貨幣兌換約數，$1兌134韓圜。